Հայաստանը, հետևելով ԱՄՆ-ին և ԵՄ-ին, արգելում է TikTok-ը

Հայաստանի հեռուստատեսության և ռադիոյի հանձնաժողովի նախագահ Տիգրան Հակոբյանը խորհրդարանին կոչ է արել սահմանափակել չինական TikTok սոցիալական հարթակը Հայաստանում, գրում է anna-news.info-ն։

Հատկանշական է այն, որ նա դա բացատրել է Եվրահանձնաժողովի ղեկավար Ուրսուլա ֆոն դեր Լեյենի թելադրանքով, ով արդեն հայտարարել էր Եվրամիությունում TikTok-ի հնարավոր արգելափակման մասին։ Նա նաև նշել է, որ նմանատիպ գործողություններ են դիտարկվում ԱՄՆ կառավարության կողմից, և այժմ, ըստ Հակոբյանի` Հայաստանը կմիանա «ժողովրդավարական երկրներին»։ Նրա խոսքով` նույնիսկ ամենաժողովրդավարական երկրները սկսում են սահմանափակել այն ալիքներն ու ցանցերը, որոնք վտանգ են ներկայացնում։ Հակոբյանը կարծում է, որ դրա պատճառը, հաճախ, ոչ թե քաղաքական վտանգն է, այլ բացասական բովանդակության տարածումը։
«Եթե այլ երկրներ նման միջոցներ են ձեռնարկում, ապա միգուցե մենք էլ կարող ենք դա անել։ Ես վստահ չեմ տեխնիկական իրագործելիության հարցում, քանի որ պատկերացնում եմ, որ դա կարող է թանկ արժենալ, բայց մենք անպայման պետք է սահմանափակենք այն հարթակները, որոնք վտանգ են ներկայացնում մեր հասարակության համար»,- ասել է նա:

Հիշեցնենք, որ Նիկոլ Փաշինյանի կառավարությունն արդեն նախորդ տարիներին փորձեր է արել սահմանափակել TikTok սոցիալական ցանցի գործունեությունը։ 2023 թվականի փետրվարին հաղորդվեց, որ իշխանությունները կրկին արգելափակելու են TikTok-ը Հայաստանում, ինչպես դա եղավ 2020 և 2022 թվականներին։ Այն ժամանակ պաշտոնական վարկած էր Ադրբեջանի հետ Լեռնային Ղարաբաղում ռազմական գործողությունների ընթացքում հայկական զինտեխնիկայի տեղաշարժերի մասին տեղեկատվության արտահոսքը։

Անցյալ տարի Հայաստանի իշխանությունները սկսել էին քննարկել «Ռազմական դրության իրավական ռեժիմի մասին» օրենքում փոփոխությունների նախագիծը։ Այսպիսով, Նախարարների կաբինետը ձգտում էր ժամանակավորապես դադարեցնել ինտերնետ կայքերի, սոցիալական ցանցերի, ինտերնետային հավելվածների գործունեությունը, մասամբ կամ ամբողջությամբ սահմանափակել ինտերնետ հասանելիությունը։ Բացի այդ, երկրի արդարադատության նախարարությունը նախկինում հասել էր օրինագծի ընդունմանը, որը թույլ է տալիս կառավարությանը արգելափակել սոցիալական ցանցերը, էլեկտրոնային լրատվամիջոցները, հավելվածները և ինտերնետի հետ կապված ամեն ինչ, որը կարող է դիտվել որպես «ռազմական դրության իրավական ռեժիմի» սպառնալիք: Հավելենք, որ 2020 թվականի հոկտեմբերին Հայաստանում ընդհատումներ են եղել TikTok-ի աշխատանքում։

Հետաքրքիր է այն, որ Հայաստանի իշխանության պայքարը չինական սոցիալական ցանցի դեմ տեղի է ունենում Հայաստանում ռուսական լրատվամիջոցների գրաքննությանն ու ռուս հեռուստահաղորդավար Վլադիմիր Սոլովյովի հաղորդումների հեռարձակման արգելքին զուգահեռ։