Մեղրիից մինչև Տավուշ՝ Ադրբեջանն ունի 15 զինվորական զորամաս՝ 45. 000 զինծառայողներով. Վոլոդյա Հովհաննիսյան
ՔԱՂԱՔԱԿԱՆՈՒԹՅՈՒՆՏավուշից հանձնվել է 8 դիրք, հերթում Գեղարքունիքի 12,Կապանի 5 գյուղերի սահմանազատումն է: Այս մասին «Փաստինֆո»-ի եթերում հայտարարել է գնդապետ Վոլոդյա Հովհաննիսյանը` ավելացնելով, որ Նոյեմբերյանի այն դիրքում, որտեղ ծառայում էր իմ եղբոր տղան, այսօր արդեն ծածանվում է ադրբեջանական դրոշը:
«Մերոնք արդեն հետ են քաշվել, 7-9 կիլոմետրանոց հատվածի մասին է խոսքը, եկեղեցու դիմաց՝ աջ և ձախ կողմերում այս պահին էլ ականազերծում են, որպեսզի թուրքերը կարողանան անարգել առաջխաղացում ունենալ։ Սա նշանակում է, որ Կիրանցից, Բաղանիստից, Ոսկեպարից մոտավորապես 800 հետկար անցնում է թուրքին, մենք ձեռք ենք բերում 200 հեկտար, այսինքն, 600 հեկտար մեր պատմական հողերից տալիս ենք թուրքին», - արձանագրել է նա։
Հովհաննիսյանը նկատել է, որ թուրքերն առանց մեկ կրակոցի ճեղքել են մեր ամենահզոր պաշտպանական կառույցների շղթան, որը հայ ժողովուրդը զոհողությունների գնով 30 տարի կառուցել էր։
«Իսկ գուցե ճի՞շտն են տարածվող այն լուրերը, որ փող են տվել Նիկոլ Փաշինյանին։ Գուցե ճի՞շտ են լուրերը, որ 5 մլրդ Արցախի, 2 մլրդ այդ սարերի համար գումար է տրվել Փաշինյանին, որովհետև Ալիևը հայտարարում է, որ ոչ մի միլիմետր հետ չեն քաշվելու։ Ուստի, ոչ թե սահմանազատում է, այլ` հայոց հողերի դավաճանական հանձնում», - նշել է նա։
Ավելին` փորձագետը նկատել է, որ ՀՀ սահմանին՝ Մեղրիից մինչև Տավուշ՝ Ադրբեջանն ունի 15 զինվորական զորամաս, կենտրոնացված 45. 000 զինծառայող:
«Ադրբեջանը չի հայտարարել, որ իր սահմանները Հայաստանի հետ պահպանելու են սահմանապահները։Հակառակը, իրենց բանակը տարեկան մի քանի զորավարժություններ է կատարում։ Այսինքն, Ադրբեջանը մինչև ատամները զինված բանակ է ունենալու, մենք ունենալու ենք շրջիկ սահմանապահներ՝ ֆրանսիական թեթև մեքենաներով։ Սա այն դեպքում, երբ այսօր սահմանապահ զորքերի համալրման լուրջ խնդիր կա Հայաստանում, ոչ մեկ չի ուզում գնալ սահմանապահ զորքերում ծառայելու», - նշել է նա` ավելացնելով, որ առաջիկայում նաև Գեղարքունիքից են իջեցվելու զորքերը։
«Այս պահին արագ-արագ հանում են 2020 թ-ից հետո տեղադրված ակաները, ականազերծում են, որպեսզի հետո աղմուկ չլինի, հետո տեսնելու ենք, որ այնտեղ ադրբեջանական գյուղեր են կառուցվում։ Ինչու միայն Գեղարքունիքում, նաև Մասիս են գալու, ադրբեջանցիները լավ զարկ կտան կոկորդիլոսաբուծությանը»,-հավելել է Հովհաննիսյանը։
