Բավականին մեծ գումարներ ծախսելով՝ մենք չստացանք բարեփոխված ոստիկանություն. Մելքոնյան

Ոստիկանների անօրինական գործողություններին բազմիցս անդրադարձել են երկրում գործող գրեթե բոլոր իրավապաշտպան կառույցները, նույնիսկ միջազգային իրավապաշտպան կառույցները` ի դեմս Freedom House-ի, ով վերջին զեկույցում մանրամասն անդրադարձ է կատարել, թե ինչպես են բիրտ ուժի կիրառմամբ քաղաքացիներին բերման ենթարկում, ոստիկանության բաժիններում էլ դաժանաբար ծեծի ենթարկում և ստորացնում, նույնիսկ փաստաբաններին է բաժին հասել այդ վերաբերմունքը։ Այս մասին նաև խոսում է ՀՀ ՄԻՊ-ը և արձանագրում բազում խախտումներ։

Ոստիկանների գործողությունները, հատկապես 2020թ.-ից հետո, նման քննադատության են արժանանում հասարակության տարբեր շերտերի կողմից։ Ոստիկանությունն, առհասարակ, պետք է ծառայի ժողովրդին, լինի նրա պաշտպանը և իրականացնի օրենքով իր առջև դրված պարտականությունները։ Նրանք աշխատավարձ են ստանում Նիկոլ Փաշինյանի գնահատմամբ` «հերոս հարկատուների» վճարած հարկերից և հետևաբար պարտավոր են օրենքի շրջանակներում պաշտպանել հենց այդ քաղաքացիներին։

Ամենօրյա ակցիաները, օր օրի պետության տարածքների միակողմանի հանձնման դեմ պայքարող բազմությունն ավելանում  է և դրան զուգահեռ ավելանում է նաև ոստիկանական տարբեր կառույցների կողմից կիրառվող բիրտ ուժը։ Ընդամենը երեկ Տավուշի մարզի Կիրանց գյուղից բերման ենթարկվեցին մոտ 3 տասնյակ քաղաքացիներ, որոնց ոստիկանները, բառի ուղիղ իմաստով, ծեծելով բաժին էին տանում։ Ցավոք սա առաջին դեպքը չէ։ 

Ոստիկանության նախկին սպա, գնդապետ Ռոբերտ Մելքոնյանի գնահատմամբ՝ սա անընդունելի է։ «Նման իրավիճակը ստեղծվել է 2018թ.-ից, երբ այս խումբն իշխանության եկավ։ Հեղափոխություն էին ասում, բայց հեղաշրջում դուրս եկավ։ Այս տարիներին ոստիկանությունը զրկվեց պրոֆեսիոնալ կադրերից։ Բավականին մեծ գումարներ ծախսելով` մենք չստացանք բարեփոխված  ոստիկանություն։ Արևմտյան երկրները ֆինանսավորեցին այս որակի ոստիկանության ստեղծումը։ Այդ երկրներն ավելի լկտի ոստիկանություն ունեն և ավելի բիրտ ուժով են բերման ենթարկում իրենց քաղաքացիներին։ Երևի դա է բարեփոխումը և ոստիկանները ձգտում են դրան։ Նախկինում ամենափոքր արարքը ցցուն  երևում էր, հիմա բոլորն աչք են փակում նույնիսկ շատ-շատ ավելի բացասական բաների վրա։ Նախկինում ազատ խոսքի ջատագովներ կային՝ Սաքունցը, Բաղդասարյանը, Իոաննիսյանը և այլն, և այլն, հիմա ծպտուն չեն հանում ոստիկանության կողմից կիրառվող այդ գործողությունների վերաբերյալ։ Հիմա ամեն ինչ կարելի է, ինչպես նաև այդ ամենը չնկատել և ասել, որ ոստիկանությունը գործողությունները տանում է օրինականության սահմաններում»,- նշեց Մելքոնյանը։

Գնդապետը հիշեցնում է՝ ոստիկանությունը գոյատևում է հարկատուների հաշվին և նրանք պարտավոր են պաշտպանել քաղաքացիների շահերը, անվտանգությունը։ Պարտավոր են հասարակական կարգը պահպանել և ոչ թե խախտել։ 

«Երբ ես աշխատում էի, ոստիկանների կողմից պարտադիր հայտարարվում էր քաղաքացիների գործողությունների անօրինականության մասին, հետևանքների մասին էր հիշեցվում, հղում էր արվում օրենքին, ապա նոր ոստիկանները միջամտում էին։ Նման ուժ չէր կիրառվում, քարշ չէին տալիս կանանց, զոհվածների մայրերին, այլ միայն իսկապես կարգ խախտողներին, իսկ հիմա թացն ու չորը խառնվել է իրար: Պրոֆեսիոնալ ճանապարհ փակող Փաշինյանի խումբը մեզ բերման ենթարկեց ճանապարհ փակելու համար, ինքս էլ մեկ օր ձերբակալված մնացի, առանց որևէ բան ասելու, որևէ պատճառի։ Նման բազմաքանակությամբ ոստիկանությունը բերման ենթարկելու չի գնացել։ 10 հոգի 1 հուգու քարշ տալով բերման են ենթարկում, սա պրոֆեսիոնալիզմի պակաս է», - նշեց գնդապետը և հավելեց, որ նույնը կարելի է անել շատ քաղաքավարի և պրոֆեսիոնալ ձևով։