Փաշինյանն ամբողջ հանդիպման ընթացքում անհանգիստ էր, նեղվում էր, որ այդ շներին թշնամի էինք ասում․ Կիրանցի բնակիչը՝ վարչապետի հետ փակ հանդիպման մասին 

Երեկ Երևանում տեղի է ունեցել Կիրանց գյուղի բնակիչների և վարչապետ Նիկոլ Փաշինյանի հանդիպումը։ Հանդիպմանը մասնակցած մի բնակիչ 1or.am-ին ասաց, որ նախ երկար են սպասել մուտք գործելուն, փաստաթղթերի ստուգումներին, հետո մի քիչ էլ՝ վարչապետին։

«Հանդիպման ընթացքում ոչ մի հուսադրող բան չասաց, տղամարդկանց, նույնիսկ վարչական ղեկավարների հարցերը մնացին անպատասխան։ Հարցրեցինք՝ կա՞ երաշխիք, որ այդ տարածքները միակողմանի թշնամուն հանձնելուց հետո անվտանգությունը երաշխավորում է․ կտրուկ պատասխանեց՝ ոչ։ Ասաց, որ գուցե 7 օր ամեն ինչ լավ լինի, բայց 8-րդ օրը նորից հարձակվեն կամ հակառակը և այլն։ Մի խոսքով, իր տնկած սյուները երաշխիք չեն, որ թշնամին էլի չի հարձակվի մեզ վրա։ Տպավորություն է, որ մեր անվտանգության մասին չի էլ մտածում, թքած ունի՝ մեզ կմորթե՞ն, թե՞ ոչ։ Ասում է՝ հստակ երաշխավորում է, որ եթե չտանք պատերազմ է լինելու, և մենք հաստատ այդ մարտում չենք հաղթելու։

Որտեղի՞ց գիտի, Ալիևի հետ պայմանավորվե՞լ է, որ մենք պիտի պարտվենք ու վերջ։ 2021թ. ընտրություններում այլ բան էր ասում, գյուղի մեծ մասն էլ իրեն հավատաց, հիմա մեր տունն է հանձնում, Կիրանցի կամուրջը, որը շատ կարևոր է բնակիչների համար։ Հրաշք բնություն ունենք, մեր տունը, տեղը թողնենք, գնանք որտե՞ղ ապրենք։ Մենք ասել ենք, որ մեզ իր փոխհատուցումը պետք չի, պայքարելու ենք մեր եղածի համար։ Համայնքապետն էլ ասաց, որ հող չունի թուրքին հանձնելու։

Փաշինյանն ամբողջ հանդիպման ընթացքում անհանգիստ էր, նեղվում էր, որ այդ թուրք և ադրբեջանցի շներին թշնամի էինք ասում, իրեն հազիվ էր զսպում և փորձում էր ձևացնել թե ամեն ինչ կարգին է, մեզ հանգստացնում էր ու ամեն 2-րդ նախադասությունը նրա մասին էր, թե փոխատուցում կտան, ու որ այլ ելք չկա, պայքարի իմաստ էլ չկա»,- 1or.am-ին պատմեց բնակիչը՝ նշելով, որ եթե չի կարողանում ոչ մի բան անի, որ երկիրը չտա թուրքին, ապա թող իրերը հավաքի ու հեռանա, 2021-ին այլ խոստումով է իշխանության եկել։