Պուտինը հավասարակշռություն է փնտրում Անդրկովկասում
ՔԱՂԱՔԱԿԱՆՈՒԹՅՈՒՆ
Պուտինի և Ալիևի հանդիպումը առաջինն էր Ադրբեջանում և Ռուսաստանում նախագահական ընտրություններից հետո, գրում է ura.news-ը։
Միաժամանակ, փորձագետները նշում են, որ Պուտինը Ալիևին հրավիրել է Մոսկվա մինչև իր երդմնակալությունը, որը տեղի կունենա ընդամենը երկու շաբաթից։ Դրանից առաջ նա բանակցություններ էր վարել Բելառուսի առաջնորդ Ալեքսանդր Լուկաշենկոյի հետ: Դրանով իսկ ընդգծվում են երկրի արտաքին քաղաքականության ռազմավարական ուղղությունները, Ալիևի այցը հաստատում է Ռուսաստանի հետ Ադրբեջանի հարաբերությունների ռազմավարական բնույթը։ Անդրկովկասում իրավիճակը սրում է Հայաստանի վարչապետ Նիկոլ Փաշինյանը, ով հակամարտություն է հրահրում թե՛ հարևան Ադրբեջանի, թե՛ Ռուսաստանի հետ։
«Արևմուտքի խնդիրն է՝ օգտագործել Փաշինյանին Ռուսաստանին դնելու ընտրության առաջ՝ կա՛մ բացել երկրորդ ճակատ և կռվել Ադրբեջանի, հետևաբար նրա գլխավոր դաշնակից Թուրքիայի հետ, կա՛մ խայտառակ կերպով թողնել Անդրկովկասը,- կարծում է Ինովացիոն զարգացման ինստիտուտի աշխարհաքաղաքական հետազոտությունների կենտրոնի ղեկավար Դմիտրի Ռոդիոնովը,- սակայն Ռուսաստանը զուսպ է արձագանքում Փաշինյանի գործողություններին և փորձում է հավասարակշռել՝ թե՛ Երևանի, թե՛ Բաքվի հետ հարաբերությունները պահպանելու համար։ Նույնիսկ այն իրավիճակներում, երբ Փաշինյանը մեղադրում էր ռուս խաղաղապահներին և ՀԱՊԿ-ին Ղարաբաղի հարցում Հայաստանի կողքին չլինելու մեջ, երբ հայտարարեց ՀԱՊԿ-ին անդամակցությունը կասեցնելու մասին, երբ պահանջում էր ռուս սահմանապահներին դուրս բերել Երևանի օդանավակայանից, հիմա էլ՝ Տավուշից։ Ավելին, դրան դեմ են իրենք՝ շրջանի բնակիչները, մարդիկ հավատում են, որ Փաշինյանն է իրենց հանձնում, Ադրբեջանը կարող է խլել իրենց տարածքը»։
Նշենք, որ Փաշինյանի կողմից վերահսկվող Telegram ալիքները Տավուշի բնակիչների բողոքի ցույցերում տեսնում են «Կրեմլի ձեռքը» և հերթական անգամ սադրում են Մոսկվային ընտրելու հակամարտության կողմերից մեկին։ Սանկտ Պետերբուրգի պետական համալսարանի հետխորհրդային տարածքի միջազգային հարաբերությունների ամբիոնի վարիչ Նիյազի Նիյազովը կարծում է, որ Պուտինի և Ալիևի հանդիպումը Փաշինյանի քայլերի ֆոնին կհանգեցնի Ռուսաստանի և Ադրբեջանի միջև հարաբերությունների խորացմանը քաղաքական, տնտեսական և ռազմական ոլորտներում, բայց դա չի լինի «Հայաստանի դեմ»։
«Մոսկվայի և Բաքվի հարաբերություններն ունեն իրենց զարգացման տրամաբանությունը և ի սկզբանե կենտրոնացած են համագործակցության վրա։ Ռուսաստանը փորձում է աջակցել Ադրբեջանին հատկապես Արևմուտքին հակազդելու հարցերում,- պարզաբանել է քաղաքագետը, - Ադրբեջանը Ռուսաստանի դաշնակիցն է, պայմանականորեն՝ վահանը: Չէ՞ որ այդ վահանը չի կարող ուղղված լինել միայն Թուրքիայի ու Իրանի դեմ, քանի որ Ռուսաստանը լավ հարաբերություններ ունի այդ երկու երկրների հետ»։
Ըստ ՄԳԻՄՕ-ի Միջազգային անվտանգության կենտրոնի առաջատար հետազոտող Ստանիսլավ Իվանովի՝ Ռուսաստանի համար կարևոր է Ադրբեջանի հետ «բարիդրացիական հարաբերություններ» պահպանելը։ Փորձեր են եղել են սեպ խրել նրանց մեջ Բաքվից Կիև ռազմական մատակարարումների մասին հաղորդումների միջոցով, բայց ամեն ինչ անօգուտ է եղել: Արևմուտքից անկախ Ադրբեջանի քաղաքականությունն ապահովում է Ռուսաստանի անվտանգությունը Անդրկովկասում՝ հաստատել է Քաղաքական գործընթացների փորձագիտական աջակցության կենտրոնի ղեկավար Ալեքսեյ Յարոշենկոն։
«Արևմուտքն օգտագործում է Հայաստանի ղեկավարությունը Ռուսաստանի վրա ճնշում գործադրելու համար։ Ադրբեջանը շարունակում է մնալ Ռուսաստանի գործընկեր Անդրկովկասյան տարածաշրջանում։ Ուստի Ռուսաստանը կփորձի խորացնել քաղաքական, տնտեսական, հնարավոր է նաև ռազմական հարաբերությունները Ադրբեջանի հետ, և դա կամրապնդի Ռուսաստանի դերը տարածաշրջանում։ Դա իսկապես կարելի է անել, քանի որ Ադրբեջանը, հետխորհրդային բոլոր երկրներից ամենաքիչն է ունակ ենթարկվելու ուրիշներին»,- ասել է նա։
Նյութը հրապարակման պատրաստեց Կամո Խաչիկյանը
