Փաշինյանի լեգիտիմությունն օր օրի անկում է ապրում. Բոզոյանը՝ Freedom House-ի զեկույցների մասին

«Հայաստանում 2023թ.-ին, ժողովրդավարական կառավարման վարկանիշը նվազել է՝ 2.50-ից հասնելով 2.25-ի՝ կառավարության կողմից ուժի կոնսոլիդացիայի, կենտրոնական իշխանությունների կողմից ընդդիմադիր քաղաքապետերին պաշտոնանկ անելու արդեն մի քանի տարի շարունակվող միտումների, և իշխող կուսակցության ֆինանսական միջոցների թափանցիկության պակասի պատճառով». սա հատված է Freedom House հեղինակավոր կազմակերպության տարեկան զեկույցից: Կազմակերպությունն իր Nations in Transit 2024 («Ազգերը տարանցման մեջ 2024») տարեկան զեկույցում անդրադարձել է Հայաստանի խորհրդարանի նախագահ Ալեն Սիմոնյանի համար արարքների հետևանքների բացակայությանը, օրինակ` երբ թքել էր իրեն «դավաճան» անվանող քաղաքացու վրա։

Ըստ «Freedom House»-ի՝ ՀՀ դատական համակարգը 7 բալային համակարգի սանդղակով ստացել է 2.75 միավոր: Արդարադատության նախկին նախարար, «Քաղաքացիական պայմանագրի» անդամ Կարեն Անդրեասյանի պաշտոնավարումը` Բարձրագույն դատական խորհրդի (ԲԴԽ) ղեկավարի պաշտոնում, հիշվեց որոշ դատավորների նշանակման և ազատման վերաբերյալ հակասական որոշումներով: Զեկույցում նաև նշվում է, որ հատկապես մտահոգիչ են կարգապահական կամ այլ միջոցները դատավորների նկատմամբ: Անդրադառնալով կալանքներին՝ զեկույցում նշվում է, որ ընդդիմադիր քաղաքական գործիչները, ակտիվիստներն ու իրավաբանները բողոքում են խափանման միջոց կալանքը որպես պատժիչ միջոց կիրառելու շարունակական պրակտիկայից։

«Թեև 2021 թվականից Հայաստանը կիրառում է այլընտրանքային կանխարգելիչ միջոցներ, ինչպիսիք են տնային կալանքը և պաշտոնանկությունը, նախնական կալանքը մնում է ամենատարածված պրակտիկան և կիրառվում է մի շարք ընդդիմադիր գործիչների նկատմամբ»:

Նշվում է դատավոր Դավիթ Հարությունյանի հետ կապված իրավիճակը: Զեկույցում հատուկ շեշտվում է ոստիկանության կողմից ուժի գործադրումը։ Freedom House-ը 2018թ.-ի իշխանափոխությունից հետո առաջին անգամ է, որ կասկածի տակ է դնում Հայաստանի ժողովրդավարությունը և քննադատում բոլոր ոլորտները: Քաղաքագետ Երվանդ Բոզոյանի գնահատմամբ՝ ՀՀ իշխանությունն իր լեգիտիմությունը կորցնում է գրեթե բոլոր ոլորտներում:

«ՀՀ իշխանության լեգիտիմությունն էական նվազեց Արցախի անկմամբ, հետո առաջացավ ՀՀ անվտանգության խնդիրը: Այս ամենից ելնելով՝ կոշտացրեց իր քաղաքականությունը՝ սկսվեցին ռեպրեսիաներ, ճնշումներ լրագողնրի նկատմամբ, ոստիկանության բաժիններում ուժի կիրառում, խոշտանգումներ և այլն: Հենց այս իրավիճակն են արձանագրում միջազգային կառույցները: Իրենք էմոցիոնալ հայտարարություններ չեն անում, արձանագրում են այն՝ ինչը կա: Եթե Freedom House-ն արձանագրում է, որ կա այդպիսի խնդիր, ապա պետք է դիտարկել, որ սա կարող է ազդել Արևմուտքի և Փաշինյանի քաղաքականության վրա: Եթե սա չի ստացվել, Արևմուտքը կասկածելու է, որ Փաշինյանը կկարողանա իրենց քաղաքականությունն առաջ տանել նաև մյուս ոլորտներում»,- 1or.am-ին ասաց Բոզոյանը:

Քաղաքագետի գնահատմամբ՝ Փաշինյանի լեգիտիմությունն օր օրի անկում է ապրում բոլոր ոլորտներում՝ տնտեսական, սոցիալական, քաղաքական և այլն: «Սամվել Վարդանյանի հետ կապված վերջին իրադարձությունները հիշեցրին Սահակաշվիլու իշխանության վերջին դրվագները: Տարբերությունն այն էր, որ այնտեղի բանտի ծեծի կադրերը կային, իսկ Սամվել Վարդանյանինը դեռ չկա»,- եզրափակեց քաղաքագետ Երվանդ Բոզոյանը: