Ջուր չկա, աշխատանք չկա, տանիքները կաթում են. Շուռնուխին ուշադրություն է պետք

Hraparak.am-ը գրում է․

Այս թոհուբոհի մեջ մենք մտաբերեցինք Շուռնուխի տների կառուցման հարցը: Պատերազմից հետո առաջ եկած թշնամին, հիշեցնենք, ուղղակի երկու մասի բաժանեց Շուռնուխը, որի մի մասն իբրեւ թե GPS-ով իրենց էր պատկանում: ՀՀ իշխանությունը մի գրամ անգամ չառարկեց դրան, այլ բնակիչներին հորդորեց հեռանալ իրենց տներից, որոնց մի մասը մնացել էր թշնամու տիրապետության տակ, եւ խոստացել էին, որ նոր տներ կկառուցեն տներից զրկված շուռնուխցիների համար: Ծրագրի կատարումն իր վրա վերցրեց Գորիս խոշորացված համայնքի ղեկավար Առուշ Առուշանյանը: Երեկ մենք հետաքրքրվեցինք, թե ավարտվե՞լ է այդ ծրագիրը, եւ մարդիկ արդեն ապրո՞ւմ են նոր բնակարաններում:

«Հրապարակի» հետ զրույցում Գորիս խոշորացված համայնքի Շուռնուխ վարչական շրջանի ղեկավար Գրիգոր Դարբինյանն ասաց, որ աշխատանքները վերջացած են, մի երկու օրվա գործ է մնացել։ Հիշեցնենք, որ 2021 թվականի հունվարի 5-ին 13 ընտանիք ստիպված էր եղել լքել սեփական տները։ Կառավարության որոշմամբ՝ բնակարանաշինության ծրագիր էր մշակվել, որն արդեն երեք տարի է՝ ընթացքի մեջ է։ Երեւանում բազմաբնակարան` 14 հարկանի շենք են կանգնեցնում մեկ տարում, Շուռնուխում 13 հոգու համար նախատեսված տները չեն կարողացել դեռ հանձնել: Թե տները երբ կհանձնվեն շահագործման, Դարբինյանը չի կարող ասել, քանի որ այդ հարցը կառավարության որոշման տիրույթում է։ Կառուցվող տները նախատեսված են միայն 13 ընտանիքի համար․ «Առանձնատներ են՝ պարսպով, գոմով, ամեն ինչով։ Առանձին գոմեր են սարքված, իրենց բոստանով, այսինքն՝ հողամաս ունի, գոմ ունի, մեջն էլ՝ ջահերը կախված, խոհանոցում լվացարանը տեղադրված։ Լույսերի խնդիրն է, սյուները դրել են, լարերը քաշել են, մնում է վերջին ակորդներն անեն, ու վերջ»։

Իրենց տներին սպասող շուռնուխցիների հիմնական մասը ժամանակավորապես բնակվում է Գորիս եւ Կապան քաղաքներում՝ սպասում են, թե երբ պիտի տները հանձնեն, որ վերադառնան հայրենի Շուռնուխ։ Դարբինյանը շեշտում է, որ շուռնուխցիները տեղեկացրել են՝ կառավարության կողմից տրամադրվող 68 հազարական դրամները` վարձակալության համար նախատեսված, հունվարից այս կողմ չեն ստացել։ Հավանաբար որոշել են, որ արդեն տները պատրաստ են` ինչո՞ւ վարձի փողեր տան:

Չնայած գյուղի ջրագծերը քաշված են, սակայն գյուղում խմելու ջրի խնդիր էլ կա՝ ասում է Դարբինյանը։ «Անձրեւաջրերի հաշվին հիմա ջուր կա, բայց դա լուծում չէ։ Ես ասել եմ՝ Տաթեւ համայնքից 40 կմ պիտի քաշվի, բերվի գյուղ, որ թե՛ տների խմելու ջրի համար, թե՛ ոռոգման նպատակով գյուղին ծառայի։ Այդ հարցը ներկայացրել եմ, որ պիտի լուծվի։ Կարող է մայիսից, հունիսից հետո այդ ջուրը կտրվի, մարդիկ մնան առանց ջրի»,- ասաց Շուռնուխի վարչական ղեկավարը։

Գյուղի դպրոցն ու մանկապարտեզն էլ են գործում, իսկ ինչ վերաբերում է արտաքին աշխարհի հետ կապին` տրանսպորտին, այդ հարցը լուծել է Գորիսի համայնքապետ Առուշ Առուշանյանը։ «Մեր համայնքապետը՝ Առուշ Առուշանյանը, նոր մեքենա է տվել երեք գյուղերին՝ Շուռնուխ, Բարձրավան, Որոտան, եւ շաբաթվա մեջ երկու օր՝ երկուշաբթի եւ հինգշաբթի, ժողովուրդը նոր մեքենայով, անվճար գնում-գալիս է»,- ասաց Դարբինյանը։

Նա ասում է, որ գյուղի ժողովրդին մի քիչ ավել ուշադրություն է պետք դարձնել, հատկապես աշխատանքով ապահովելու հարցն է պետք լուծել։ «Պիտի գան-գնան, ժողովրդի հալը հարցնեն, մարդիկ աշխատանք չունեն։ Մարդկանց տանիքներից ջուրը կաթում է, լցվում տները, բոլորի տանիքները փոխվելու ենթակա են՝ վիճակ չկա, մարդկանց մասին պիտի մտածեն»,- եզրափակեց Շուռնուխի վարչական ղեկավարը։