ԱԱԾ ստուգումների բացառիկ մանրամասներ. կան ձերբակալված պաշտոնյաներ

Երեկվանից մամուլում լուրեր են տարածվում, որ ԱԱԾ-ն խուզարկություններ է իրականացնում «Ուիգմոր» ԲԿ-ում և առողջապահական մի շարք հիմնարկներում։

Ըստ 1or.am-ի տեղեկությունների՝ վարույթը վերաբերվում է պետական պատվերին և դրա շուրջ պետությանն առանձնապես խոշոր չափերի վնասներ պատճառելուն։ Որ նախարարության ենթակա կառույցներում և «Ուիգմոր» ԲԿ-ում խուզարկություններ և ձերբակալություններ են եղել, Առողջապահության նախարարը, իր խոսքով, իմացել է մամուլից, սակայն հաստատել է տեղեկությունը՝ նշելով, որ մանրամասներին չի տիրապետում։

Այս պահին ԱԱԾ-ի կողմից բերման ենթարկված 4 պաշտոնատար անձ կա, որոնցից մեկը արդեն պաշտոնանկ արված Առողջապահության նախարարության ՊԱԳ պետ Ահարոն Բարսեղյանն է, ով համակարգում էր մարզային, երևանյան ԲԿ-ների և այլ բուժհաստատությունների պետպատվերի բաշխումները։ Բերման են ենթարկվել նաև ԱՆ երեխաների առողջության պահպանման բաժնի պետ Լիլիթ Ավետիսյանը, «Ուիգմոր» ԲԿ տնօրեն Զավեն Քոլոյանը և ԱՆ լիցենզավորման բաժնի պետ Տիգրան Ավետիսյանը։ Բերման ենթարկված չորս անձանցից երկուսն արդեն ձերբակալվել են։

ԱԱԾ-ն «Ուիգմոր» ԲԿ-ից և ԱՆ գերատեսչություններից նաև տեխնիկա է առգրավել՝ մասնավորապես, մի քանի համակարգիչներ, որտեղ տեղեկություններ կան պետական պատվերի շրջանակներում բուժօգնություն ստացած անձանց վերաբերյալ։

Նշեք, որ «Ուիգմոր» ԲԿ-ից հայտարարություն էին տարածել, որ այս պահին հայտնի չեն  տեղեկություններ, քանի որ վարույթն իրավապահների տիրույթում է։

Նկատենք, որ «Ուիգմոր» ԲԿ-ի անունը կապվում է Առողջապահության նախարար Անահիտ Ավանեսյանի մայրիկի՝ Մարգարիտա Վարդանյանի հետ։ Ըստ ԶԼՄ տարբեր հրապարակումների՝ կլինիկայի իրական սեփականատերը Ավանեսյանի մայրիկն է։