Ալեն Սիմոնյանի հնչեցրած սպառնալիքներն իրականություն դարձան. Ժողովրդավարության բաստիոնում հարցերն այսպե՞ս են լուծվում 

Երեկ հանրային տրանսպորտում միջադեպ էր տեղի ունեցել ՔՊ-ական պատգամավոր Հակոբ Ասլանյանի և Սամվել Վարդանյան անուն-ազգանունով մի երիտասարդի միջև: Վարդանյանին ձերբակալել են, այսօր էլ ձերբակալվածների պահման վայր տեղափոխելիս ծեծի են ենթարկել: Երթուղայինում նկարահանված տեսանյութից երևում է, որ երիտասարդը վիրավորում է պատգամավորին, ինչից հետո նրան առաջինը հարվածում է հենց Ասլանյանը և այլն: Միջադեպի մի հատված տեսանկարահանված չէ, և հստակ պնդումներ անել հնարավոր չէ: Ամեն դեպքում, պատգամավորի հաղորդման հիման վրա նախաձեռնված է քրեական վարույթ, գործն իրավապահների տիրույթում է, սակայն ԱԺ նախագահը շտապեց դեպքին գնահատական տալ:

Ալեն Սիմոնյանը ՀՀ օրենսդիր մարմնի ամենաբարձր օղակն է ներկայացնում, և որպես ՀՀ քաղաքացի ու հատկապես ԱԺ նախագահ պարտավոր է հարգել օրենքը և անձի անմեղության կանխավարկածի իրավունքը: Սիմոնյանը Սամվել Վարդանյանին անվանել է «ոչնչություն», սպառնացել նրան և այլն: Երիտասարդին հստակ արարք վերագրելու համար նախ պետք էր սպասել գործի քննությանը:

Ի վերջո, եվրոպական քաղաքակրթություն և արժեքներ քարոզող թավշյա իշխանության ներկայացուցիչներն իսկապե՞ս կարծում են, որ բոլոր հանցագործները ոչնչություն են: Այն, որ Սիմոնյանը նման կարծիք ուներ գերիների մասին՝ անձամբ ինքն է ասել, բայց ենթադրյալ հանցագործություն կատարողների մասին նրա կարծիքը նորություն էր:

Ի դեպ, ինչո՞վ էր երիտասարդի արդար ցասման դրսևորումը տարբերվում Սիմոնյանի՝ քաղաքացու վրա թքելու արարքից: Ինչո՞ւ սա խուլիգանություն չէր, իսկ Սամվել Վարդանյանի արարքը խուլիգանություն է: Սիմոնյանի մայրիկի հայհոյանքը ցուցարարներին խուլիգանություն չէ, իսկ պատգամավորին թեև չհայհոյելը խուլիգանական է և այլն:

Քննչական կոմիտեն կայծակնային արագությամբ վարույթ նախաձեռնեց, Վարդանյանը ձերբակալվեց, բայց նրան ծեծելու դրվագով, դեռ որևէ վարույթ չկա: Հավանաբար սա հենց երեկ Ալեն Սիմոնյանի հնչեցրած սպառնալիքների դրսևորումն է:

Ժողովրդավարության բաստիոնում փաստացի հենց այսպես են վարվում այլախոհների հետ: