Տեղեկատվական անորոշությունը՝ խուճապի պատճառ․ ո՞ւր են պատկան կառույցները
ՔԱՂԱՔԱԿԱՆՈՒԹՅՈՒՆ
Վաղ առավոտից՝ 7։20-ից, տելեգրամյան ալիքներով, հիմնականում ֆեյք էջերով տարածվում է, թե իբր Երևանի դպրոցներում ահաբեկչական հարձակում է պատրաստվում։
Ուսուցիչներն ու ծնողները խառնվել են իրար։ Տեղեկության կեղծ լինելու մասին ահազանգեցին մեդիա փորձագետները՝ ցույց տալով, որ տարածվող լուսանկարը կեղծ է, ինչպես կարելի է ստուգել և այլն։
Դպրոցներում կատարյալ անորոշություն էր, ոչ մի դպրոց չգիտեր՝ դադարեցնե՞լ դասապրոցեսը, թե՞ ոչ։
Խնդիրն այն չէր, որ ծնողները կամ դպրոցները հավատացել էին լուրերի իսկությանը։ Հարցն այն է, որ իսպառ բացակայում է պաշտոնական տեղեկատվությունը։ Ներքին գործերի նախարարությունը մինչ այս պահը հաղորդագրություն չի տարածել։
Ազգային անվտանգության ծառայությունը լրատվամիջոցներին հայտնել է, որ տեղեկատվությանը կանդրադառնա ավելի ուշ. 7։20-ից տարածվող տեղեկատվությանը…
Այն դեպքում, երբ խոսքը ահաբեկչության վտանգի մասին է, այդ կառույցից միայն ինչ-որ պաշտոնյաներ են արձագանքում այս կամ այն լրատվականին, պաշտոնական ոչ մի հաղորդագրություն չկա։
Նիկոլ Աղբալյանի անվան դպրոցի փոխտնօրենի խոսքով՝ ԱԱԾ-ն ու Ոստիկանությունն իրենց դպրոցում ստուգողական աշխատանքներ են իրականացնում։ Կրթության, գիտության, մշակույթի և սպորտի նախարարությունը տարածվող լուրին արձագանքեց միայն 12։35-ին՝ 5 ժամ անց։
Ընդ որում, չխոսելով աշակերտների անվտանգության մասին՝ միայն նշվեց, որ դասապրոցեսն ընթանում է բնականոն հունով։ Սա այն դեպքում, երբ ծնողների մեծ մասը, հատկապես Կենտրոն վարչական շրջանի դպրոցների աշակերտներին արդեն տարել էին տուն։
Որոշ տնօրեններ դադարեցրել էին դասապրոցեսը և աշակերտներին տուն ուղարկել՝ հայտարարելով, որ երկրորդ հերթի աշակերտները դասի չգնան։ Այսինքն դպրոցները իրավիճակի կարգավորումը թողել էին քաղաքացիներին՝ ով ցանկանում է, թող իր երեխային տանի տուն, ով ոչ՝ թող մնա։
Սա կրկին համակարգված աշխատանքի բացակայություն է։ Որոշումը բացառապես վերին օղակից պիտի գա՝ կա՛մ դասերը շարունակվում են, կա՛մ՝ ոչ։
Քիչ առաջ էլ քաղաքապետարանն էր խոսում լուրի կեղծ լինելու մասին՝ դարձյալ միայն լրատվամիջոցի հարցին ի պատասխան։ Դպրոցները փաստացի Երևանի քաղաքապետարանի ենթակայության տակ են, բայց՝ ոչ մի պաշտոնական հողորդագրություն…
