30 տարի առաջ արված գործարքը բերել «հետ ողորմյա» անել, մեղմ ասած, իրավաչափ չէ․ ՀԳՄ փաստաբան
ՔԱՂԱՔԱԿԱՆՈՒԹՅՈՒՆ
Իշխանությունը որոշել է պետականացնել հասարակական կառույցներ հանդիսացող ստեղծագործական միությունների շենքերը։
Դրա մասին նամակ-գրություններ են ստացել գրողների և նկարիչների միությունները, առաջիկայում սպասվում է, որ նույնաբովանդակ նամակներ ստանալու են նաև մյուս միությունները։
Ինչպես տեղեկացանք, թե՛ գրողների, թե՛ նկարիչների միություններն օրերս արտահերթ նիստեր են հրավիրել ու քննարկել իշխանության պահանջը, ինչպես նաև՝ իրենց հետագա քայլերը։
Պարզվում է՝ ՀՀ դատախազությունը դատական հայց է ներկայացրել Կադաստրի կոմիտեի դեմ և հայցադիմումի մեջ պահանջում է անվավեր ճանաչել ՀՀ կադաստրի կոմիտեի՝ Գրողների միությանը տրված 2001թ․ օգոստոսի 9-ի սեփականության իրավունքի պետական գրանցումը և որպես անվավերության հետևանք՝ վերացնել 2013թ․ հունիսի 3-ի սեփականության իրավունքի պետական գրանցումը։
ՀԳՄ նախագահ Էդվարդ Միլիտոնյանը 1or.am հետ զրույցում նշել էր, որ պետությունը հաշվի չի առնում 1999թ-ի գործարքը, որով շենքը տրվել է Գրողների միությանը։
ՀԳՄ ներկայացուցիչ, փաստաբան Լևոն Բաղդասարյանը 1or.am-ին ասաց, որ գործը նոր է վերցրել և մանրամասն կարող է անդրադառնալ միայն փաստաթղթերին ծանոթանալուց հետո։
«Հայցվորը Գլխավոր դատախազությունն է, իսկ հայցի առարկան Գրողների միության անշարժ գույքերը պետականացնելն է։ Նշեմ, որ 1999թ-ին իրավունքի ուժով գույքն անցել է ՀԳՄ-ին։ Այստեղ կարևոր է այն, որ շենքը ոչ թե սեփականաշնորհվել է, այլ՝ իրավունքի ուժով սեփականության իրավունքն անցել է իմ վստահորդ կազմակերպությանը։ Դրանք տարբեր բաներ են։ Այստեղ պետք է արձանագրել, որ իրավունքը գիտություն է բարու և արդարի մասին, և այդ սկզբունքով պետք է աշխատեն բոլորը՝ հատկապես պետական և լիազոր մարմինները։ Այնտեղ Շիրազ ու Իսահակյան է մտել։ Մի նժարի վրա կարելի է դնել պետական շահը, մյուսի վրա էլ վերը նշածս։ Կարծում եմ, որ այստեղ նժարը պետք է շեղվի այն ուղղությամբ, որտեղ հայրենիքի մշակույթ է ձևավորվում։ Իրավական հարթությունում 30 տարի առաջ արված գործարքը բերել «հետ ողորմյա» անել, մեղմ ասած, իրավաչափ չէ։ Այստեղ գործում է վաղեմության ժամկետ։ Ավելի մանրամասն կարձագանքեմ, երբ նյութերին ամբողջությամբ ծանոթացած լինեմ», - եզրափակեց փաստաբան Բաղդասարյանը։
