Այստեղ իրավաբանություն չկա, ես չգիտեմ ինչի՞ դեմ առարկեմ․ Աշոտյանի պաշտպան

 ՀՀԿ փոխնախագահ Արմեն Աշոտյանի և մյուսների գործով դատարանը մերժել է հանրային մեղադրողի հայցադիմումը։

«Դատարանը հայցը մերժեց՝ գտնելով, որ տվյալ դեպքում պետությանը վնաս չի պատճառվել, քանի որ ԵՊԲՀ-ն ունի, որպես սեփականություն, առանձնացված գույք, այն օգտագործում է օրենքով և իր կանոնադրությամբ սահմանված կարգով, ուստի դատախազությունը չի կարող գույքային հայց ներկայացնել։ Պետության կողմից բուհ-ի հիմնադիր լինելն, ըստ դատավոր Վահե Դոլմազյանի, պետությանը նման իրավունք չի տալիս։ Սույն գործով, ըստ դատավորի, ենթադրյալ վնասը պատճառվել է «Մխիթար Հերացի» արհեստակցական միությանը, մինչդեռ միության լիազոր ներկայացուցիչը, մասնավոր անձին պատճառված վնասի փոխհատուցման հայց դեռ չի ներկայացրել դատարան։ Այս մասին 1or.am-ին ասաց Աշոտյանի պաշտպան Տիգրան Աթանեսյանը։

Հանրային մեղադրողը պահանջում էր մեղադրյալներ` Արմեն Աշոտյանից, Մարթա Սիմոնյանից, Լարիսա Բարսեղյանից, Միքայել Նարիմանյանից բռնագանձել հօգուտ պետության՝ մոտ 905 միլիոն դրամ, որից մոտ 39 մլն դրամը Արմեն Աշոտյանից։ Հարցին` երբ գույքը փաստացի գոյություն ունի և շուկայական արժեքն այս պահին մի քանի անգամ թանկ է, քան գնման պահին, պետությանը կամ ԵՊԲՀ-ին ինչպե՞ս է վնաս պատճառվել։

Աթանեսյանը նշեց․ «Գործի հենց սկզբից դրա մասին էինք խոսում ոչ մի վնաս էլ չի պատճառվել, չկա վնաս։ Սա պարզապես քաղաքական պատվեր է, ինչ հիմանավորում ասես կարող են գրել և մարդուն կալանավորել։ Այստեղ իրավական որևէ գործընթաց չկա, սա քաղաքական հետապնդում է և պետք է ունենա քաղաքական հանգուցալուծում։ Այստեղ իրավաբանություն չկա, ես չգիտեմ ինչի՞ դեմ առարկեմ։ Ակնհայտ է, որ անձն ընդդիմադիր գործիչ է և իրեն լռեցնելու համար կալանավորել են»։

Հիշեցնեք, որ Աշոտյանը, շուրջ 10 ամիս է գտնվում է կալանքի տակ։ Նրան առաջադրված է մեղադրանք երկու դրվագով՝ պաշտոնական դիրքի չարաշահում, որն առաջացրել է ծանր հետևանքներ և փողերի լվացում։

Հիշեցնենք, որ Աշոտյանը և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող` մոտ 100 հազար դոլարի գույք հափշտակելու մեջ: Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը:

«Ծովասար» հյուրանոցային համալիրի քոթեջները գնվել են ԱԺ պատգամավոր Իշխան Սաղաթելյանի հորից։

Նկատենք, որ գործում 5 մեղադրյալ կա, և միայն Աշոտյանի խափանման միջոցն է ընտրված` կալանքը։