Ընդդիմադիր պատգամավորները Տավուշում էին. պաշտոնական և կուլիսային
ՔԱՂԱՔԱԿԱՆՈՒԹՅՈՒՆ
Ապրիլի 6-ին Տավուշի մարզում էին ընդդիմադիր մի քանի պատգամավորներ՝ Սեյրան Օհանյանը, Իշխան Սաղաթելյանը, Լևոն Քոչարյանը, Գառնիկ Դանիելյանը, Ասպրամ Կրպեյանը, Աղվան Վարդանյանը և այլք։
Ընդդիմադիրներն այցելել են Նոյեմբերյան, Ոսկեպար, Կողբ։
1or.am-ի տեղեկություններով՝ Կողբի նկարչական դպրոցում նրանց համար խնջույք է կազմակերպվել։
Դպրոցի տնօրեն Կարապետ Ղուլիջանյանը, ըստ տեղի բնակիչների, դաշնակցական է և Իշխան Սաղաթելյանի ընկերը։
Ներսից ազգային երաժշտություն է լսվել: Մնացել են 2-3 ժամ։ Կողբի բնակիչների հետ հատուկ հանդիպում նախատեսված չի եղել։
Բնակիչներից մեկը 1or.am-ին ասաց․
«Իմ կարծիքով՝ մեծ սխալ են արել, որ Երևանից հասել են Կողբ ու 5500 բնակչություն ունեցող Կողբում՝ ոչ մի հանդիպում, ոչ մի մասնավոր զրույց: Եվ սա այն դեպքում, երբ մի քանի հարյուր բնակչություն ունեցող գյուղերում սակավաթիվ մարդկանց հետ հանդիպումներ են ունեցել: Կողբում, որտեղ իրենց միջոցառումն էին անում, տարածքում ժողովուրդը հավաքված էր, կարելի էր մոտենալ, շփվել»։
Բնակչի խոսքով՝ եթե հանդիպում լիներ, գյուղի մեծ մասը կմասնակցեր և հարցեր կտար։ Իսկ Ոսկեպարում ընդդիմադիրներին այնքան էլ ոգևորված չեն ընդունել։ Բնակիչներն, իհարկե, անհանգստացած են Ոսկեպարի հանձմամբ և կարևորել են Հայաստանում իշխանափոխությունը, բայց կտրուկ քայլերի գյուղում չեն պատրաստվում։
Ոմանք նույնիսկ ասել են, թե իրենց քաղաքային բնակավայրերում տուն են խոստացել՝ գյուղը հանձնելու դեպքում, կարծիքներ են հնչել, թե հիմա ընդդիմությունը խանգարելու է, որ իրենց նոր տուն տան։
Ոմանք նույնիսկ արդեն իրենց անասուններին են վաճառում, չնայած սա համատարած չէ։ Հիմնականում քննարկումներ ու բնակիչների հետ հանդիպումներ եղել են Նոյեմբերյանում, որտեղ էլ ընդդիմադիրները խոսել են գալիք ընտրությունների մասին՝ նշելով, որ պետք է լրջագույնս պատրաստվել։
Քաղաքացիները հորդորել են գնալ իշխանափոխության, փողոցային պայքարի թույլատրելի և նույնիսկ անթույլատրելի միջոցների։ Նոյեմբերյանում ավելի շատ են եղել վճռական քայլերի պատրաստ քաղաքացիները, որոնք պատրաստ են պայքարել թե՛ Ոսկեպարի, թե՛ ՀՀ սահմանային ցանկացած հատվածի համար։ Լևոն Քոչարյանին ասել են, որ եթե Երևանում փողոցային պայքար սկսեն, իրենք կմիանան, բայց նոր ընտրություններին, որոնց դեռ 2 տարուց ավելի ժամանակ կա, չեն ցանկանում սպասել։
