Նոր մանրամասներ «պարետ» Սարգիս Գալստյանի վերադարձից

Արցախի հայաթափումից հետո Ստեփանակերտում մնացած Սարգիս Գալստյանը 7 ամիս անց կնոջ հետ մարտի 29-ին տեղափոխվել է Հայաստան, սակայն, այստեղ ձերբակալվել է, ապա կալանավորվել` լրտեսության մեղադրանքով։ 

MediaHub-ին հասած տեղեկություններով` Գալստյանի հարազատները դիմել են Կարմիր խաչի առաքելությանը մեղադրանքով, թե ինչո՞ւ են իրենց ուղեկցությամբ տեղափոխված անձանց կալանավորել։ Նրանք պատասխանել են, որ իրենց պարտականությունը կատարել են, պետական սահմանն անց են կացրել։ Մեր աղբյուրը փոխանցեց, որ Գալստյանն ու կինը երկար ժամանակ ինտերնետ կապ չեն ունեցել, իսկ իրենց կողմից բացված «Արցախ իմ սիրտ» ինստագրամյան խումբը փակվել է։

«Այդ խմբի միջոցով Գալստյանի կինը՝ Մարգարիտան, տեսանյութեր ու լուսանկարներ էր հրապարակում, իսկ նրանք, ովքեր օգտվում էին խմբի «ծառայությունից», փոխանցման եղանակով վճարում էին 5000 դրամ, որի ստացողը իր աղջիկն էր՝ Արփեն Գալստյանը։ Այստեղ ևս շատ տարօրինակ բան կա, որ դրա մասին ոչ ոք չխոսեց, չքննադատվեց։ Իրենց ցանկությամբ ադրբեջանցիների հետ մնացած անձինք բիզնեսով էին զբաղված»,- ասաց նա։ 

Մեր զրուցակիցը նաև տեղեկացրեց, որ նախքան իրենց վերադարձը Սարգսի ու Մարգարիտայի հարազատների հետ խոսել ու իր մտահոգությունն է հայտնել ամուսինների այնտեղ մնալու կապակցությամբ։ Գալստյանները պատմել են, որ դատարկված քաղաքում կյանքն անհետաքրքիր է։ Ստեփանակերտում զինվորականներից բացի ոչ ոք չկա, իսկ այնտեղ մնացած հայերը շփումներում անադեկվատ են, բացի այդ, Ալիևների այցի ժամանակ նրանց ելումուտն արգելված է։ 

«Տեղեկություններ ունեմ, որ նրանք ուզում էին վերադառնալ ավելի շուտ, քանի որ, ըստ իրենց, կյանքն Արցախում կանգ է առել, սակայն, մտավախություն ունեին, որ այստեղ իրենց չեն ընդունի։ Չի բացառվում, որ նրանց ադրբեջանցիներն են ուղարկել հատուկ առաքելության համար»,- ասաց մեր զրուցակիցը։

Ստեփանակերտի բնակիչը նաև տեղեկացրեց, որ Գալստյանի կինը, ըստ իրենց տեղեկությունների, ևս ձերբակալված է. Մարգարիտայի ու հարազատների հեռախոսները մարտի 29-ից այս կողմ՝ անհասանելի են։