Ֆրանսիան ակնարկել է Ադրբեջանին, որ իրավիճակի սրացման դեպքում COP 29-ը կչեղարկվի
ՔԱՂԱՔԱԿԱՆՈՒԹՅՈՒՆ
Ֆրանսիան վերահաստատում է իր աջակցությունը Հայաստանի տարածքային ամբողջականությանը. ԱՄՆ պետքարտուղար Էնթոնի Բլինկենի հետ համատեղ ճեպազրույցում ասել է Հինգերորդ Հանրապետության արտաքին գործերի նախարար Ստեֆան Սեժուրնեն, գրում է Eadaily.com-ը։
Փարիզին և Վաշինգտոնին հուզող հարցերի մեջ ներառված է իրավիճակը Հարավային Կովկասում, նշել է ֆրանսիական դիվանագիտության ղեկավարը։
Ադրբեջանը կասկածի տակ է դնում Հայաստանի տարածքային ամբողջականությունը, և այդ կապակցությամբ Ֆրանսիան մտահոգություն է հայտնում պաշտոնական Բաքվի «ագրեսիվ գործողությունների և հռետորաբանության» առնչությամբ, նշել է նախարարը։
«Դա ներառում է կեղծիքների տարածումը, որոնք կրկնում է Բաքուն, և որով փորձում է իրավիճակի (հնարավոր) սրման պատասխանատվությունը տեղափոխել Հայաստանի վրա»,- ասել է Ֆրանսիայի արտգործնախարարը։
Դիմելով Բլինքենին Սեժուրնեն նաև նշել է, որ Ֆրանսիան և Միացյալ Նահանգները, ի թիվս այլ բաների, պետք է ուշադրություն դարձնեն Բաքվում կայանալիք կլիմայական կոնֆերանսի (COP 29) վերաբերյալ առաջիկա խորհրդակցություններին (նախատեսված է այս տարվա նոյեմբերին):
Հիշեցնենք, որ վերջին օրերին Ադրբեջանի ՊՆ-ն պնդում է, որ դիտարկում է հայ-ադրբեջանական սահմանի տարբեր հատվածներում հայկական զինված ուժերի ակտիվ տեղաշարժեր, սահմանային շրջաններում հայկական զորքերի կենտրոնացում և «հարձակողական աջակցության հենակետերի» ստեղծում։
Միաժամանակ Բաքվից զգուշացրել են, որ «Հայաստանի կողմից ցանկացած սադրանք վճռականորեն կանխվելու է ադրբեջանական բանակի կողմից, և իրավիճակի սրման ողջ պատասխանատվությունը ընկնելու է Հայաստանի ռազմաքաղաքական ղեկավարության և նրա հովանավորների վրա»:
Հայաստանի «հովանավորներ» ասելով ադրբեջանական կողմը, ըստ երևույթին, նկատի ունի Ֆրանսիան (ԵՄ) և ԱՄՆ-ը։
ՀՀ ՊՆ-ն ի պատասխան ուշադրություն է հրավիրում այն փաստի վրա, որ «Հայաստանի Հանրապետության ինքնիշխան տարածքում ինժեներական աշխատանքների իրականացումը Հայաստանի Հանրապետության ինքնիշխան իրավունքն է, և դրանք բացառապես պաշտպանական բնույթ են կրում»։
Երևանում միաժամանակ հայ-ադրբեջանական սահմանի երկայնքով օպերատիվ իրավիճակը գնահատվել է «կայուն և չկա սահմանը պաշտպանելու համար լրացուցիչ միջոցներ ձեռնարկելու անհրաժեշտություն, հետևաբար զորքերի կուտակման մասին տեղեկությունները չեն համապատասխանում իրականությանը»։
Նյութը հրապարակման պատրաստեց Կամո Խաչիկյանը
