Հայաստանը շարունակում է իր աշխարհաքաղաքական շրջադարձը
ՔԱՂԱՔԱԿԱՆՈՒԹՅՈՒՆ
Ապրիլյան քառօրյա պատերազմի տարելիցին ընդառաջ, ՀԱՊԿ-ը հայտարարել է, որ կազմակերպության պատասխանատվության տարածքը տարածվում է Հայաստանի ինքնիշխան տարածքի վրա՝ կարգավորված պետական սահմանների շրջանակներում։
Միաժամանակ ընդգծվել է, որ հարցը բավականին բարդ է, և Երևանն այն տալիս է ավելի շատ իր խնդրի վրա ուշադրություն հրավիրելու, քան պատասխան ստանալու համար, գրում է Ng.ru-ն։
ՄԳԻՄՕ-ի Կովկասի սեկտորի ղեկավար Վադիմ Մուխանովը կարծում է, որ Հայաստանի իշխանությունները և հատկապես վարչապետ Նիկոլ Փաշինյանը չպետք է մեղավորներ փնտրեն հանրապետության բոլոր խնդիրները նրանց վրա բարդելու համար, այլ պետք է աշխատեն սահմանի ամրապնդման և պետական ինստիտուտների, այդ թվում բանակի հզորացման ուղղությամբ։
Ի վերջո, դա կլինի երկրի անվտանգության հիմնական երաշխիքը, այլ ոչ թե որոշ «կուրատորների» փոխարինումը մյուսներով։
«Նախկինում ՀԱՊԿ-ն ասում էր, որ կազմակերպությունը և Երևանը տարբեր գնահատականներ ունեն, թե որտեղ է գտնվում կազմակերպության պատասխանատվության տարածքը։ Այսինքն այնտեղ չէին կարողացել ասել, թե կոնկրետ որտեղ է գտնվում Հայաստանի սահմանը։ Այս անգամ ՀԱՊԿ-ը պարզաբանել է իր դիրքորոշումը: Իսկ ընդհանրապես մենք ականատես ենք դիվանագիտական սպարինգի։ Ավելին, Փաշինյանն առաջինը քայլ արեց, երբ հայտարարեց ՀԱՊԿ-ին անդամակցության սառեցման մասին և սպառնաց դուրս գալ ռազմական դաշինքից»,- ընդգծել է Մուխանովը։
Կովկասագետի խոսքով, Փաշինյանը ՀԱՊԿ-ից իրականում որևէ արձագանք չի էլ ակնկալում և ընդհանրապես հույսը չի դնում այդ կազմակերպության օգնության վրա։ Փոխարենը, Երևանը փորձում է բարեկամանալ արևմտյան երկրների ներկայացուցիչների հետ, ուստի ապագայում նրա հարաբերությունները ռազմական բլոկի հետ, որտեղ գտնվում է ներկայումս, ավելի կվատթարանան։ Մուխանովը կարծում է, որ եթե Հայաստանի իշխանությունները ձգտեին բարելավել հարաբերությունները իրենց ներկայիս ռազմական դաշնակիցների հետ, ապա չէին ձեռնարկի այնպիսի քայլեր, որոնք Մոսկվան համարում է թշնամական։
Այդ թվում Ուկրաինայի ղեկավարության հետ հանդիպումները չէին լինի։ Իր հերթին, Ռազմավարական հետազոտությունների և նախաձեռնությունների վերլուծական կենտրոնի ղեկավար Հայկ Խալաթյանը կարծում է, որ եթե նույնիսկ Երևանը ՀԱՊԿ-ից ստանար լիովին բավարարող պատասխան, դա չէր փոխի նրա արտաքին քաղաքականությունը։
«Իմ կարծիքով, Հայաստանի իշխանությունները կշարունակեն հավատարիմ մնալ կազմակերպությունից դուրս գալու ընթացքին, քանի որ նրանց նպատակը Ռուսաստանի հետ դաշինքային հարաբերությունների վերանայումն է և աշխարհաքաղաքական շրջադարձը։ Միակ բանը, որ այժմ կարող է ազդել Փաշինյանի վրա, դա վախն է սեփական իշխանության անվտանգության համար: Ուրիշ ոչինչ Երևանին հետ չի պահի Արևմուտքի հետ մերձեցումից»,- կարծիք է հայտնել փորձագետը։
Նյութը հրապարակման պատրաստեց Կամո Խաչիկյանը
