Բոլթոնյան պլանի վերջին ակորդը

Օրերս, Սերգեյ Լավրովը հայտարարել էր, թե «ՀՀ ղեկավարությունն, անկեղծ ասած, մտացածին պատրվակներով, խեղաթյուրելով վերջին երեք տարիների պատմությունը` միտումնավոր տանում է ՌԴ-ի հետ հարաբերությունների փլուզման` մեր զինծառայողների, որոնք ծառայում են 102-րդ ռազմաբազայում, սահմանապահների, և ընդհանուր առմամբ` ՀԱՊԿ զրպարտությանը»։

Վերջինիս գնահատականով՝ «Հայաստանում ստեղծված իրավիճակը լավատեսություն չի ներշնչում»։ Անդրադառնալով Հայաստան-ՀԱՊԿ հակասություններին՝ Լավրովը նշել է, որ Երևանում չեն խոսում այն մասին, թե կառույցը «բազմիցս է պաշտպանել Հայաստանի շահերը դժվարին իրավիճակներում»։

Ի դեպ, Լավրովը բողոքել է, որ երևանում տեղի ունեցած նիստից օրեր անց, Փաշինյանը նույնպիսի խաղաղապահ առաքելություն է հրավիրել ԵՄ-ից, որն, ըստ նրա, արդեն վերածվում է ՆԱՏՕ-ի առաքելության։ Նա նաև ասել է, որ ՌԴ-ն երբեք չի հրաժարվում իր պայմանավորվածություններից։

Ըստ էության, առաջին անգամ ռուսական կողմը պաշտոնական մակարդակով արձանագրում է, որ հայ-ռուսական հարաբերություններ այլևս չկան, ՀՀ իշխանությունները չեն շփվում ռուսական կողմի հետ, չկան զանգեր Մոսկվա՝ ոչ ԱԳ նախարարի, ոչ ղեկավարների մակարդակով, չկան այցեր։

Մենք տեսնում ենք, որ ՀՀ իշխանություններն այս տարվանից սկսած արդեն ուղիղ ձևով խզում են հայ-ռուսական հարաբերությունները, ինչ-որ արհեստական կապ են պահում՝ ուղերձներով, նամակներով շնորհավորելով կամ ցավակցելով ռուսական կողմին։ Այլ կերպ ասած` Փաշինյանը ռուսների հետ «բլիժնի բոյ» է մտել և փորձում է ամեն գնով իրեն թանկ «ծախել» Արևմուտքին։

Դեպքերի զարգացումն այնպիսի ընթացք է ստացել, որ ՀՀ իշխանությունները Ռուսաստանի հետ վարում են «հեռագրային դիվանագիտություն». ՀՀ իշխանությունները «Զվարթնոց» օդանավակայանից սկսել են ռուսական ներկայությունը ՀՀ-ից դուրս բերելու գործընթացը։ Իսկ օրերս սկսեցին նաև ՀՀ-ում եթերազրկել ռուսական հաղորդումները, չի բացառվում, որ առաջիկայում ռուսական հեռուստաալիքների հեռարձակումն ընդհանրապես դադարեցվի։

Տեղի ունեցող գործընթացները բնավ զարմանալի չեն․ փաստացի, ոչ մի առանցքային շփումներ, հանդիպումներ չկան, ավելին Փաշինյանը քիչ-քիչ վերացնում է բոլոր կապող օղակները։ Տեսեք` ինչ տեղի ունեցավ․ սկզբում Նիկոլն ինքն` իր իսկ քայլերով խնդիր ստեղծեց ՀՀ-ի համար, դա բարդեց ռուսական կողմի վրա, որդեգրեց «դժգոհ» կամ «նեղացած» երկրի կարգավիճակ, որից հետո էլ սկսեց հայտարարել, որ դիվերսիֆիկացիա է սկսում։

Իրականում իրավիճակի մարազմը կայանում է նրանում, որ սա ոչ թե դիվերսիֆիկացիա է, այլ հայ-ռուսական ավանդական հարաբերությունների քանդում և ինտենսիվ կերպով արևմտյան կողմնորոշման որդեգրում։

Հարգելինե՛րս, այն ինչ այսօր տեղի է ունենում դիվերսիֆիկացիա չէ, այլ հիմնական կողմնորոշման, դաշնակցի փոփոխություն, և գրեթե ոչ մի կասկած չկա, որ առաջիկայում օրակարգում կդրվի նաև ՀՀ-ի՝ ՀԱՊԿ-ից դուրս գալու և ռուսական 102-րդ ռազմաբազայի դուրսբերման հարցը։

Եթե չգիտեք՝ ասեմ, որ Արևմուտքում մեծ ոգևորությամբ հենց այս քայլերին են սպասում։

Իսկ թե ինչ կալամբուրի մեջ կհայտնվենք մենք ողջ ժողովրդով ու պետությունով, տվյալ դեպքում Փաշինյան Նիկոլին ընդհանրապես չի հուզում, կարևորը, որ նա բոլթոնյան իր պլանը փայլուն կերպով հասցնում է ավարտին, դե իսկ թուրքական տերերը գոհ են, հոգիները՝ փառավորված։

Արմեն Հովասափյան