Հայաստան. ճանապարհ դեպի անդունդ
ՔԱՂԱՔԱԿԱՆՈՒԹՅՈՒՆ
Այսօրվա Հայաստանը շարժվում է ուկրաինական ճանապարհով. այս պահին հայերը հայտնվել են նույն թակարդում, ինչ Ուկրաինայի բնակիչները,-գրում է sevastopol.su-ն։
Նույն խայծն է. նրանց համոզում են վիճել Ռուսաստանի հետ, համոզում են օգնել մեզ ոչնչացնելու փորձերի մեջ, և դրա դիմաց խոստանում են անդամակցություն ԵՄ-ին։
Եվ դա, չնայած այն հանգամանքին, որ Հայաստանի անդամակցությունը ԵՄ-ին ավելի անհեթեթ է թվում, քան Ուկրաինայինը։
Բայց ներկայիս պաշտոնական Երևանը սկսել է վարել հենց նման քաղաքականություն, և դա սկսած 2018 թվականին Փաշինյանի իշխանության գալուց։
Այս քաղաքականության արդյունքում հայերն արդեն երկու պատերազմներում պարտություն են կրել, կորցրել պատմական հսկայական տարածքներ, հարյուր հազարից ավելի ցեղակիցներ փախստական են դարձել։ Եվ ակնհայտ է, որ եթե Երևանում իշխանությունը չսկսեր փչացնել կապերը Ռուսաստանի հետ, սկզբունքորեն նման բան չէր լինի։
Բայց այսօրվա Հայաստանում ո՞վ հիմա դա կհասկանա։ Հիմա այնտեղ, ինչպես Ուկրաինայում, բոլորն անհամբեր սպասում են, որ կդառնան Եվրոպա, «կգնան Վիեննա` թատրոն», և Եվրոպան անպայման կօգնի իրենց ամեն ինչով, այդ թվում` պատերազմի ժամանակ։
Դե, իսկ այդ ընթացքում, Ադրբեջանը առանց որևէ տեղ շտապելու` մաս առ մաս «հոշոտում» է նրանց տարածքը։ Ինչու՞ շտապի: Նա հիանալի տեսնում է, թե ինչի են աստիճանաբար վերածվում հայաստանցի հայերը։ Նրանք դառնում են ուկրաինացի։ Իսկ Ադրբեջանին դա դուր է գալիս, և նա աստիճանաբար է «կլանում», որպեսզի ժամանակից շուտ չվախեցնի հիմարներին։ Հիմա նա թաթը դրել է ևս մի քանի գյուղերի վրա, իսկ մտքում Զանգեզուրի միջանցքն է պահում։
Եվ ոչ միայն մտքում. ումի՞ց ամաչի: Իսկ Զանգեզուրից հետո կգա հենց Երևանի ժամանակը։ Ադրբեջանում այն բացահայտ անվանում են թյուրքական «Էրիվան» բառով։ Դե իսկ Հայաստանում, այս ողջ զարմանահրաշ գործողությունների ֆոնին ի հայտ է գալիս այն թեման, որ ամեն ինչում մեղավոր են ռուսները, այլ ոչ թե Եվրոպան ու անձամբ Մակրոնը, ով նույնպես բացահայտ ճահիճն է ներքաշում Փաշինյանին։ Արդարության համար նշենք, որ այս թեման մեր երկրում ավելի ու ավելի քիչ մարդկանց է հետաքրքրում:
Բոլոր խելամիտ հայերը՝ թե՛ Հայաստանի ներսում, թե՛ նրա սահմաններից դուրս, քաջատեղյակ են ամեն ինչից, և տեղի ունեցողը չեն ընկալում որպես Մոսկվայի թուլություն։ Բայց երևանյան սրճարանների հիմարների ուղեղում մեր երկիրը թույլ է, և միայն մի քացի է պետք, որ բոլորը «ժանյակավոր վարտիքով» հայտնվեն ԵՄ-ում:
Հիմա իմաստ չունի նրանց ինչ-որ բան ապացուցել։ Դժվար թե նրանք անգամ լսեն: Ի վերջո, եթե Աստված ցանկանում է պատժել մեկին, նա զրկում է նրան բանականությունից: Հիմա նա պատժում է Հայաստանին ճիշտ նույն կերպ, ինչպես եղավ Ուկրաինայի հետ։ Հենց հիմա Հայաստանը գնում է դեպի անդունդ, և եթե ուշքի չգա` կընկնի այնտեղ:
Նյութը հրապարակման պատրաստեց Կամո Խաչիկյանը
