Նիկոլ Փաշինյանը ձեռնոց է նետում Վալոդ պապիին, Լեւոն Արքային եւ Աշլավաշին. TikTok-ի նոր ասպետը

1or.am-ի տեղեկություններով՝ Նիկոլ Փաշինյանին տիկտոկյան հարթակ տեղափոխելու խորհուրդը կրկին նրա մշտական իմիջմեյքերներ կինն ու ավագ դուստրն են տվել, որոնք արդեն վեց տարի իրենց խորհուրդներով միայն վնասում են տան ու երկրի ղեկավարի առանց այն էլ անկման մեջ գտնվող վարկանիշը: Վերջին սոցոլոգիական, այդ թվում՝ փակ, հարցումներով ՔՊ-ի, այն է՝ Նիկոլ Փաշինյանի, վարկանիշը իջել է բավական ժամանակ կայուն 15%-ից, եւ նվազման տեմպերը պահպանվում են: Իսկ Հայաստանի 4 գյուղերի հանձնման թեմայից հետո պրոցեսն արագացել է. անդավաճան նիկոլասերներից շատերն անգամ չեն համակերպվում իրենց երբեմնի կուռքի «շարունակական զիջողականության» հետ: Այդ հարցումները մի հետաքրքիր փաստ են արձանագրել, որ Փաշինյանով հատկապես հետաքրքրված չեն 18-ից 50 տարեկան քաղաքացիները. նրա համախոհների տարիքային ցենզը 60+ է, ու հիմնականում՝ կրթական ցածր մակարդակ ունեցողները: Երիտասարդների համար ամենուր ու նաեւ Հայաստանում, գրավիչ են հաջողակ, ուժեղ, կամային հատկություններ, կոկիկ արտաքին ու հագուկապ ունեցող անհատները: Համաձայնենք, որ կուռքի այդ կերպարին Փաշինյանը ամենեւին չի համապատասխանում: Նա մշտապես նախընտրել է «միջին գավառականի» կերպարը՝ այդպիսով փորձելով դուր գալ չկրթված, իրենց տեսքն առանձնապես չկարեւորող անձնաց, մտածելով, որ նրանք են «վճռական ու ամենակարող» էլեկտորատը: Սակայն փաստենք, որ Հայաստանում մշտապես քաղաքական պրոցեսներում ակտիվ դերակատարություն են ունեցել հենց երիտասարդները. նրանց փողոց դուրս գալու դեպքում են եղել բեկումնային պահեր: Եւ հիմա Փաշինյանի ինքնուս իմիջմեյքերները՝ կինն ու զավակները, որոշել են, որ գահավիժող վարկանիշը պետք է կանգնեցնել հենց այդ սեգմենտի՝ երիտասարդների հաշվին, նրանց դաշտում, նրանց նախասիրությունների տիրույթում արմատավորվելու միջոցով: Եվ արդյունքում Փաշինյանը «երիտասարդացել» ու հայտնվել է տիկտոկում: Նիկոլ Փաշինյանը հիրավի վաստակել է երկրի ամենաանհաջողակի տիտղոսը: Եւ նույնիսկ իր շրջապատից շատերը նրան համարում են «լուզեր», իսկ այդպիսի բնութագրում ունեցողի հետ ոչ ոք չի ուզում ճանապարհ անցնել: Հատկապես երիտասարդների համար այդ տեսակը մերժելի է: Տիկտոկը վստահաբար նրան չի օգնելու, հակառակը՝ արդարացիորեն տեղադրելու է իր իրական տեղում: