Ուկրաինական «Fierce» անօդաչու թռչող սարքը գրոհել է ռուսական նավթավերամշակման գործարանը
ՔԱՂԱՔԱԿԱՆՈՒԹՅՈՒՆ
Համացանցում հայտնվել են Ռյազանի նավթավերամշակման գործարանի վրա գրոհած անօդաչու թռչող սարքի բեկորների լուսանկարները, գրում է newizv.ru-ն։
Լրատվամիջոցների տեղեկություններով հենց այդ անօդաչու սարքերն են օգտագործվել մարտի 13-ին Ռյազանում նավթավերամշակման և Տագանրոգում ավիացիոն գործարանները խոցելու համար:
«Fierce», ռուսերեն՝ «Лютый», այսինքն «Կատաղի» ԱԹՍ-ն Ուկրաինայի պաշտպանական արդյունաբերության ամենագաղտնի զինատեսակներից մեկն է։
Այդ անօդաչու թռչող սարքի մասին քիչ բան է հայտնի։ Վառելիքի մեծ պաշարի շնորհիվ անօդաչուն կարող է անցնել 1000 կմ։ Մարտագլխիկի քաշը 75 կգ է։
Վնասող տարրերը կարող են խոցել ինքնաթիռներ, ոչ զրահապատ մեքենաներ, ինչպես նաև ձեռնարկությունների այնպիսի սարքավորումներ, ինչպիսիք են նավթավերամշակման կայանքները և վառելիքի պահեստավորման օբյեկտները:
Առաջին հայացքից «Fierce»-ը նման է թուրքական «Bayraktar»-ին, սակայն չափերով զիջում է Bayraktar PD-2-ին։ Նոր անօդաչու թռչող սարքը նաև տարբերվում է իրանական Shahed-136-ից։
Ի տարբերություն կամիկաձե անօդաչուների, «Fierce»-ը կարող է կիրառվել որպես բազմակի օգտագործման սարք: Այդ ԱԹՍ-ի առաջին մոդելը ցուցադրվել է 2023 թվականի նոյեմբերին, որից երեք ամիս անց էլ հայտնվել են նրա բեկորների լուսանկարները։
Ուկրաինան պաշտոնապես չի ներկայացրել այդ նոր անօդաչու թռչող սարքը, ուստի դրա արժեքի մասին ոչինչ հայտնի չէ։
Սակայն, հաշվի առնելով դրա կրկնակի օգտագործման հնարավորությունը, կարելի է ենթադրել, որ այդ անօդաչու թռչող սարքի արտադրությունը շատ ավելի թանկ է, քան իրանական մեկանգամյա օգտագործման կամիկաձե անօդաչու թռչող սարքերը, որոնք նույնիսկ վայրէջքի հնարավորություն չունեն։
Ռյազանի նավթավերամշակման գործարանի վրա հարձակման հետևանքով հասցված վնասը դեռ չի հրապարակվել, սակայն հայտնի է, որ վնասվել են նավթի վերամշակման երկու առաջնային բլոկները։ Վերանորոգումը կարող է տևել մի քանի ամիս:
Այդ գործարանը Մոսկվայի տարածաշրջանում բենզինի և դիզվառելիքի երեք հիմնական մատակարարներից մեկն էր։
Նյութը հրապարակման պատրաստեց Կամո Խաչիկյանը
