ԲՈՒՀ-երի տեղափոխումը միջազգային սկանդալի պատճառ կարող է դառնալ. 1or.am-ին հայտնի է դարձել, որ թեման անհանգստացրել է դեսպաններին
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանն օրերս Դիլիջանում տնտեսական քաղաքականության խորհրդի նիստին հայտարարել է, թե Երևան քաղաքում երկարաժամկետ կտրվածքում պետք է ոչ մի ԲՈՒՀ չլինի։ «Բոլոր հայաստանյան բուհերը պետք է գործեն միայն Ակադեմիական քաղաքում»,- հայտարարել է Փաշինյանը, պնդել, թե Հայաստանում կա 60 բուհ, սակայն եթե այս բուհերը հավաստագրվեն միջազգային ստանդարտներով, Հայաստանում ոչ մի բարձրագույն ուսումնական հաստատություն հավաստագրում չի ստանա։
Խոսելով բուհերի տեղափոխման հարցում առանցքային թեմաներից մեկի՝ բուհերի շենքերի ապագայի մասին, Փաշինյանը հայտարարել է, թե դրանք հնարավոր է համախմբել մի կազմակերպության մեջ և տրամադրել կառավարման միջազգային հեղինակություն ունեցող ընկերության, իսկ ստացվող գումարը բուհական համակարգի ֆինանսավորմանը ծառայի։ Մի կողմից Փաշինյանի այս հայտարարությունը վկայում է, որ գործող իշխանությունները չափազանց լուրջ են տրամադրված Հայաստանում գործող բուհերին շենքային պայմաններից զրկելու, Երևանի սահմաններից դուրս Աշտարակ տեղափոխելու հարցում, մյուս կողմից, սակայն, առանցքային հարց է ծագում, թե ինչպե՞ս պետք է իրականացվի այս ամենը։
Եթե պետական բուհերի դեպքում հնարավոր է դեռևս ինչ-որ կերպ հասկանալ իշխանության նպատակները, ապա Հայաստանում գործող առնվազն 3-4 բուհերի պարագայում իշխանությունները լրջագույն խնդիրների են բախվելու, ընդ որում՝ միջազգային մակարդակով։
Երևանում բացի հայկական պետական և ոչ պետական բուհերը, գործում են նաև Ամերիկյան համալսարանը, Ֆրանսիական համալսարանը և Սլավոնական համալսարանը։ Բոլոր այս բուհերի շենքերը կամ մասնավոր սեփականություն են կամ պատկանում են համալսարաններին կամ երկարաժամկետ վարձակալության են տված։ Դժվար է պատկերացնել, որ ԱՄՆ-ն, Ֆրանսիան և Ռուսաստանը համաձայնվեն իրենց բուհերի տարածքները հեռացնել Երևանից և կենտրոնացնել Աշտարակում։
Իսկ, եթե «օտար» ուսումնական հաստատությունների համար բացառություն արվի և դրանք մնան մայրաքաղաքում, ապա մեր քաղաքացիներն ավելի շահագրգռված կլինեն իրենց երեխաներին կրթության տալ հենց այս բուհերում, քան Աշտարակում այլևս գտնվող համալսարաններում:
