Քաղաքագետ Կալաչև. Հայաստանն առաջիկայում դուրս չի գա ՀԱՊԿ-ից
ՔԱՂԱՔԱԿԱՆՈՒԹՅՈՒՆ
Հայաստանն առայժմ կմնա ՀԱՊԿ-ում, քանի դեռ չի ստորագրվել խաղաղության պայմանագիր Ադրբեջանի հետ, բայց կազմակերպությանն անդամակցությունը լինելու է զուտ ֆորմալ, իրականում սառեցված, գրում է sila-rf.ru-ն։
Այդ մասին Lenta.ru-ի հետ զրույցում ասել է «Քաղաքական փորձագիտական խմբի» ղեկավար, քաղաքագետ Կոնստանտին Կալաչևը։
Ըստ նրա մինչև Ադրբեջանի հետ խաղաղության պայմանագրի ստորագրումը Հայաստանին որևէ խնդիր պետք չէ, և այդ հարցում Հայաստանի դիրքորոշման վրա կարող է ազդել նաև այն, որ հանրապետությունը տնտեսապես և քաղաքականապես կախված է Ռուսաստանից։
Կալաչովի խոսքով, կազմակերպության շրջանակներում Հայաստանը լինելու է միայն խորհրդանշական մասնակից, քանի որ հանրապետությունն իր համար օգուտ չի տեսնում ՀԱՊԿ անդամ լինելուց։
Զրուցակիցը նշել է, որ Հայաստանն ավելին էր ակնկալում ՀԱՊԿ-ին մասնակցությունից։ Հայաստանը դժգոհ է ՀԱՊԿ դիրքորոշումից ոչ միայն Ղարաբաղի հարցում, այլ նաև ադրբեջանական ուժերի հանրապետության տարածք ներխուժելու։
«Այս ամենը մենք անվանում ենք սահմանային հակամարտություններ, խոսում են սահմանազատման, սահմանների ապառազմականացման մասին, իսկ Հայաստանը հայտարարում է, որ, օրինակ, Ջերմուկ հանգստավայրը ոչ վաղ անցյալում ադրբեջանական կողմը գնդակոծել է հայկական տարածքից, և որ հայ զինվորները ստիպված են եղել հետ մղել ադրբեջանցիներին հենց հանրապետության տարածքում»,- պարզաբանել է Կալաչովը։
Քաղաքագետը կարծիք է հայտնել, որ այժմ Հայաստանը չի բարդացնի իրավիճակը ՀԱՊԿ-ից դուրս գալով, սակայն ռազմատեխնիկական համագործակցության առումով հանրապետությունն արդեն իսկ անցել է գործընկերության Հնդկաստանի և Ֆրանսիայի հետ։
Ըստ Կալաչովի, Հայաստանն առնվազն ներկայիս ղեկավարության օրոք արդեն կատարել է իր պատմական ընտրությունը:
Փորձագետը նշել է, որ 2021 թվականին Ադրբեջանը ճանաչվել է Ռուսաստանի դաշնակից, և դրանից հետո այդ ձևակերպումը չի փոխվել։
«Նախկինում Ադրբեջանը մեր գործընկերն էր, իսկ Հայաստանը դաշնակիցը։ Հասկանալի է, որ Հայաստանն անհանգստացած է, քանի դեռ հարևանների՝ Թուրքիայի ու Ադրբեջանի հետ հարաբերությունները չեն կարգավորվել, և նրանք դժվար թե դուրս գան ՀԱՊԿ-ից, բայց պատմական տեսանկյունից կարծում եմ, որ Հայաստանը վաղ թե ուշ կարող է դուրս գալ ՀԱՊԿ-ից»,-եզրափակել է Կալաչևը։
Նյութը հրապարակման պատրաստեց Կամո Խաչիկյանը
