ԵՄ-ն Հայաստանին առաջարկում է «ազատ անկում»՝ առանց որևէ անվտանգային երաշխիքների

ԵՄ-ի միջազգային գործընկերության գծով հանձնակատար Յուտա Ուրպիլայնենը խոսել է ԵՄ-ի և Հայաստանի միջև կապերի առավել սերտացման անհրաժեշտության և Ադրբեջանի ու Հայաստանի միջև խաղաղության համաձայնագրի անհրաժեշտության մասին։ Նա նշել է նաև, որ Հայաստանի հետ միասին ձեռնամուխ են եղել գործընկերության հավակնոտ նոր ծրագրի նախապատրաստմանը: Ըստ հանձնակատարի՝ ԵՄ առաջնահերթությունն է աշխատել Հայաստանի կենսունակության ամրապնդման և նրա տնտեսության դիվերսիֆիկացման ուղղությամբ՝ առևտրի, էներգետիկայի, կապի և ավիացիոն անվտանգության ոլորտներում համագործակցության ընդլայնման միջոցով։ Հանձնակատարը չի մոռացել ավելացնել, որ ԵՄ-ն կողմ է, որպեսզի Հայաստանը նվազեցնի  անվտանգության ոլորտում իր կախվածությունը արտաքին ազդեցությունից: Ակնհայտ է, որ արտաքին ազդեցության տակ վերջինս հասկանում է ՌԴ-ի չեզոքացումը և դա դիտարկում է իբրև ԵՄ գլխավոր նպատակներից մեկը: Ինչպես ասում են՝ անկեղծությունն, անշուշտ, ողջունելի է:

Իսկ ի՞նչ է փոխարենը պատրաստ առաջարկել ԵՄ-ն: Հանձնակատարի խոսքերից պարզ է դառնում, որ գրեթե ոչինչ: Հայաստան-ԵՄ նոր հավակնոտ ծրագիրն իրենից ներկայացնում է ընդամենը քննարկումների շարք տարատեսակ հարցերի վերաբերյալ, որոնցից մեկն էլ վիզային ռեժիմի ազատականացումն է: Ակնհայտ է, որ ԵՄ-ն դեռևս պատրաստ չէ արտոնություններ տրամադրել Հայաստանին այս մասով: Պատահական չէ, որ հանձնակատարը բաց տեքստով կոչ է անում ՀՀ ղեկավարությանն ակտիվացնել աշխատանքը համապատասխան բարեփոխումների ուղղությամբ, ասել է թե՝ առկա պայմաններում Հայաստանը չի բավարարում այն պայմաններին, որոնք անհրաժեշտ են վիզային ռեժիմի ազատականացման համար: 

ինչ վերաբերվում է ներդրումներին, ապա Ուրպիլայնեն այստեղ էլ բավական լղոզված մեկնաբանություն է տալիս: «Ներդրումների ավելացումը առանցքային նշանակություն կունենա ավելի սերտ տնտեսական համագործակցության համար: Մենք հանձնառու ենք աջակցել Հայաստանի մասնակցությանը Սև ծովում էլեկտրական մալուխի կառուցմանը և միանալուն այլ նախագծերին ու տարածաշրջանի երկրների միջև ավելի սերտ կապերի ստեղծմանը։ Տարածաշրջանի երկրների միջև ավելի սերտ կապերի ստեղծումը մեծ ներուժ ունի խաղաղությանը նպաստելու համար»,- ասել է ԵՄ-ի միջազգային գործընկերության գծով հանձնակատարը։ եթե սրան գումարենք օրեր առաջ Ժոզեպ Բորելի ակնարկը, որ ԵՄ քսակը գրեթե դատարկ է՝ Ուկրաինային հատկացվող օգնության պատճառով, ապա պարզ է դառնում, որ ԵՄ-ն չունի լուրջ ռեսուրսներ՝ Հայաստանում ներդրումներ կատարելու համար:

Էլ ավելի ուշագրավ է այն հայտարարությունը, թե ինչպես է ԵՄ-ն պատրաստվում նպաստել Հայաստանի անվտանգության ապահովմանը: Պարզվում է՝ ԵՄ հանձնակատարն այդ գործընթացը տեսնում է բացառապես ԵՄ դիտորդական առաքելության ջանքերի միջոցով:

Ստացվում է, որ Հայաստանին առաջարկվում է խզել անվտանգային կապերը ՌԴ–ի հետ, փոխարենը հայտարարում են, որ ԵՄ-ն ի վիճակի չէ և չի էլ ցանկանում ապահովել ՀՀ անվտանգությունը, չունի ֆինանսական անհրաժեշտ միջոցներ ՀՀ տնտեսությանը օժանդակելու և խթանելու համար, իսկ վիզային ռեժիմի ազատականացման մասին ընդհանրապես դեռ վաղ է խոսել ...