Մեր քաղաքացիները չպետք է ենթարկվեն թալանի, որ իշխանական անձինք ձեռք բերեն շքեղ ավտոմեքենաներ, մեկնեն թանկարժեք գործուղումների, ապրեն ցոփ ու շվայտ կյանքով․ Դանիելյան
ՏՆՏԵՍՈՒԹՅՈՒՆ
«Հայաստան» խմբակցության պատգամավոր Գառնիկ Դանիելյանը անդրադարձել է արտագնա աշխատանքի մեկնողներին հարկելու՝ իշխանությունների նախաձեռնությանը։ Պատգամավորը ֆեյսբուքյան իր էջում գրել է․
«Միանգամայն հասկանալի և ընդունելի է արտագնա աշխատանքի մեկնող անձանց ցասումն ու բողոքի նման դրսևորումը։
Արդեն տևական ժամանակ է՝ բարձրաձայնում ենք այն մասին, որ ընդունվել է ապօրինի որոշում․ քաղաքացին չպետք է ենթարկվի կրկնակի հարկման և այլ պետությունում ստացած եկամտից Հայաստանում ևս եկամտային հարկ վճարի։
Բացի այդ, մարդիկ իրենց պարտավորությունների մասին տեղեկացվել են միայն տարիներ անց, իսկ չվճարելու դեպքում ամեն օր 0․004 տոկոս է ավելանում։ Ի՞նչ է սա, եթե ոչ օրինականացված թալան։
Իշխանությունները սկզբում խոստանում էին, որ օրենսդրական փոփոխությունները չեն վերաբերելու արտագնա աշխատանքի մեկնողներին, մինչդեռ, պազվեց հերթական խաբեությունն է։
Մարդիկ կանգնելով փաստի առաջ՝ փակել են Երևան-Մարտունի ճանապարհը։ Հայտնում են, որ եթե որոշումը չչեղարկվի, հարկադրված բռնելու են արտագաղթի ճանապարհը։
ՀՀ ՊԵԿ-ը ոչ թե հիմա պետք է հայտարարեր հանրային քննարկումներ կազմակերպելու մասին, այլ մինչ օրենքի ընդունումը։ Արտագնա աշխատանքի մեկնող քաղաքացիները տեղյակ չեն եղել փոփոխություններից։
Մենք մեր ողջ գործիքակազմը օգտագործելու ենք ապօրինի որոշումը հետ կանչելու համար։ Մեր քաղաքացիները չպետք է ենթարկվեն թալանի, ինչի հաշվին իշխանական անձինք ձեռք կբերեն շքեղ ավտոմեքենաներ, կմեկնեն թանկարժեք գործուղումների, կապրեն ցոփ ու շվայտ կյանքով»։
