ԵՄ-ն ընդունեց Հայաստանին գործնականում աջակցելու պատրաստակամության բացակայությունը

2024թ. փետրվարի 13-ին Բրյուսելում կայացել է Հայաստան-ԵՄ Գործընկերության խորհրդի 5-րդ նիստը: Հանդիպմանը հաստատվել է ՀՀ և ԵՄ փոխադարձ հետաքրքրությունն ու հանձնառությունը՝ ամրապնդելու և խորացնելու հարաբերությունները՝ հիմնված ընդհանուր արժեքների վրա: Այդ նպատակով կողմերը պայմանավորվել են աշխատանքներ սկսել Հայաստան-ԵՄ Գործընկերության նոր օրակարգի ուղղությամբ՝ բոլոր հարթություններում համագործակցության համար սահմանելով ավելի հավակնոտ համատեղ առաջնահերթություններ:

Համատեղ առաջնահերթություններից մեկը դա, ըստ կողմերի, ԵՄ–ի հետ վիզային ռեժիմի ազատականացումն է: Գործընկերության խորհուրդն ընդունել է ԵՄ–ի հետ մուտքի արտոնագրերի ազատականացման երկխոսութան մեկնարկի Հայաստանի պատրաստա­կամությունը և վերահաստատել է ԵՄ–ի պատրաստակամությունը՝ շարունակել իրականացնել լրացուցիչ քայլեր՝ դիտարկելու այդ ուղղությամբ հնարավոր տարբերակները` ի շարունակություն 2023թ. նոյեմբերին կայացած արտաքին հարաբերությունների խորհրդին: ԵՄ-ն ողջունել է Հայաստանի կողմից մուտքի արտոնագրերի դյուրացման և հետընդունման համաձայնագրերի կիրարկումը և խրախուսել է Հայաստանին շարունակել իր ջանքերն այդ ուղղությամբ: Եթե փորձենք վերը նշված ձևակերպումը թարգմանել դիվանագիտական լեզվից, ապա սա նշանակում է, որ ԵՄ-ն Հայաստանին մոտ ժամանակներս չի պատրաստվում նման ճոխ նվեր անել՝ ի դեմս ԵՄ–ի հետ մուտքի արտոնագրերի ազատականացման: Խոսքը գնում է ընդամենը քննարկումների մասին, որոնք բնավ էլ նոր օրակարգի մաս չեն, դրանք ընթանում են տարիներ շարունակ և ինչպես տեսնում ենք՝ քննարկումներից այն կողմ գործը դեռ չի հասնում:

ԵՄ-ՀՀ հարաբերությունների զարգացման, այսպես կոչված՝ նոր օրակարգի մյուս մեխը տնտեսական կապերի խորացումն է: Սակայն, ուշագրավ է, որ որքան էլ հայկական կողմը փորձում է բարձրաձայնել ներդրումների կարևորության և հատկապես «Խաղաղության խաչմերուկ» նախագծի իրականացման համար դրանց անհրաժեշտության մասին, ԵՄ-ն հասկացնում է, որ այս պահին նման ֆինանսական հնարավորություններ պարզապես չունի: Ավելին՝ համատեղ հայտարարության մեջ նշվում է, որ թեև Հայաստան-ԵՄ Գործընկերության խորհուրդը ապրանքների առևտրի համար արտոնյալ սակագներ չի նախատեսել, այդուհանդերձ, այն ունի երկկողմ առևտրային հոսքերի մեծացման կարևոր ներուժ: Ստացվում է, որ Հայաստանին չի հաջողվում ԵՄ-ից ոչ միլիոնների հասնող ներդրումներ կորզել, ոչ էլ ապրանքների առևտրի համար արտոնյալ սակագներ:

Եթե ամփոփելու լինենք Հայաստան-ԵՄ Գործընկերության խորհրդի 5-րդ նիստը, ապա պետք է փաստենք, որ այն կրկին լի էր գեղեցիկ խոստումներով և դիվանագիտական կլիշեներ պարունակող շեշտադրումներով: Դրանից ավելին հայկական կողմին ԵՄ-ից դեռևս չի հաջողվում կորզել...