Ադրբեջանն ու Հայաստանը կարող են միավորել խորհրդարանները
ՎԵՐԼՈՒԾՈՒԹՅՈՒՆՆԵՐ
Vestikavkaza.ru–ն գրում է, որ Ադրբեջանի և Հայաստանի միջև միջխորհրդարանական երկխոսության հարթակ ստեղծելու շուրջ քննարկումներ կարող են տեղի ունենալ Ժնևում, երկու երկրների խոսնակների հանդիպումը կարող է տեղի ունենալ Միջխորհրդարանական միության վեհաժողովի շրջանակներում։ Նմնան կերպ լրատվամիջոցները հայտնում են Ադրբեջանի և Հայաստանի միջև միջխորհրդարանական երկխոսության հարթակի ստեղծման քննարկումների մասին, որը կարող է տեղի ունենալ մարտի վերջին Ժնևում։
Այդ հարցն Ադրբեջանի ղեկավարության հետ քննարկել է Միջխորհրդարանական միության գլխավոր քարտուղար Մարտին Չունգոնգը։ Նրան գոհացրել է Բաքվի արձագանքը։ Չունգոնգն ընդգծել է, որ Միջխորհրդարանական միությունը, որը ստեղծվել է աշխարհում խաղաղության և անվտանգության ամրապնդման համար, անհրաժեշտ է համարում քննարկումներ կազմակերպել այն մասին, թե ինչպես երկխոսությունը կլուծի խնդիրները, որոնք կարող են հանգեցնել անկայունության։ Նշվել է, որ երկու երկրների խորհրդարանների խոսնակների բանակցությունները կարող են տեղի ունենալ Միջխորհրդարանական միության վեհաժողովի ընթացքում, որը կանցկացվի մարտի 23-ից 27-ը, հանդիպումը ոչ պաշտոնական է լինելու:
Արդյո՞ք օգտակար կլինի՞ խորհրդարանականների միջև երկխոսությունը։ Ժամանակակից պետական զարգացման ինստիտուտի տնօրեն Դմիտրի Սոլոննիկովը Vestnik Kavkaza-ի թղթակցի հետ զրույցում վստահություն է հայտնել, որ երկու երկրների խորհրդարանականների անմիջական շփումները կօգնեն հայ-ադրբեջանական կարգավորմանը։ «Իմ կարծիքով, ցանկացած շփում կարող է լինել դրական և օգտակար, հարցը միայն զրույցի բովանդակությունն է, օգտակար է հարաբերություններ հաստատել քաղաքացիական հասարակության, փորձագիտական հանրության, ստեղծագործ մտավորականության և հատկապես խորհրդարանականների համար, պարզապես պետք է հստակեցնել թե ինչպիսին է լինելու նման ոչ պաշտոնական հանդիպման օրակարգը»,- ասել է նա։
«Երկխոսությունն ավելի արդյունավետ կլինի, եթե կողմերը նախ մշակեն, թե ինչի մասին են խոսելու հանդիպմանը և նախապատրաստեն քննարկման նախագծեր: Սակայն, եթե նախատեսում են հանդիպել առանց օրակարգի, պարզապես հավաքվել, լսել միմյանց հակադիր դիրքորոշումները և ցրվել, ապա դա արդեն իսկ կարող է կարգավորմանը վնաս հասցնել, հետևաբար, հարցը հանդիպման նախապատրաստման մանրակրկիտությունն է և դրա բովանդակությունը»,- ընդգծել է Դմիտրի Սոլոննիկովը։
Քաղաքագետը նաև նշել է, որ երկու երկրների ղեկավարության մակարդակով շփումներն են առաջնային։ «Առաջին հերթին արդյունավետ են պաշտոնական շփումները՝ պետությունների ղեկավարների մակարդակով, այնուհետև արտաքին գործերի և պաշտպանության նախարարությունների մակարդակով շփումները, վարչակազմերի աշխատակազմերի մակարդակով շփումները։ Բայց, իհարկե, այստեղ ամենակարևորը երկու կողմերի պրոֆեսիոնալների պաշտոնական փոխգործակցությունն է»,- եզրափակել է նա:
Նյութը հրապարակման պատրաստեց Կամո Խաչիկյանը
