Սահմանադրության փոփոխություն պարտադրելու համար Ալիևն ու Փաշինյանը կարող են նոր ագրեսիա կազմակերպել ՀՀ դեմ. «Հայաքվե»

Մենք չենք ասել, որ սահմանադրական շարժում ենք ձեւավորում։ Մենք հայտարարել ենք, որ նախաձեռնում ենք միասնական ճակատի ստեղծում՝ պայքարելու Հայաստանի անկախության հռչակագրի վերացման դեմ։ Սրանք տարբեր հասկացություններ են: Այս մասին NEWS.am-ի թղթակցի հետ զրույցում նշել է «Հայաքվե» նախաձեռնության համակարգող Ավետիք Չալաբյանը։

«Մեր նախաձեռնությունը նշանակում է, որ տարբեր ուժեր համախմբվում են կոնկրետ գործի համար։ Մեր նպատակն է ոչ թե կանխել սահմանադրական փոփոխությունները, այլ թույլ չտալ, որ գործող իշխանություններն այս քողի տակ չեղյալ համարեն Անկախության հռչակագիրը։

Կարծում ենք, որ Սահմանադրության որոշ դրույթներ պետք է վերանայվեն։ Օրինակ՝ նախագահի լիազորությունները պետք է ընդլայնվեն:

Փաշինյանը պետք է համոզի ոչ միայն իր պատգամավորներից յուրաքանչյուրին «կողմ» քվեարկել, այլ նաև մյուս խմբակցությունների պատգամավորներին, որպեսզի հանրաքվե կազմակերպվի։ Մեր նպատակն է իրավաբանորեն համոզել այս խորհրդարանականներին, որ Հայաստանն արմատախիլ անելու գործընթացին մեղսակից չդառնան։ Նրանք պետք է հասկանան, թե ինչ պատասխանատվության տակ է իրենց դնում Ալիեւի հետ գործարքի մեջ մտած Փաշինյանը։ Հարցն այն է, թե նրանք պատրա՞ստ են նման պատասխանատվություն ստանձնել»,- նշեց Չալաբյանը։

Նրա խոսքով՝ եթե Սահմանադրության փոփոխության հանրաքվեն այսօր տեղի ունենար, Փաշինյանը կտապալվեր.

«Միևնույն ժամանակ, նա հասկանում է, որ ուղղակիորեն հակադրվել հասարակական տրամադրություններին, ապարդյուն է, ուստի հաճախ դիմում է մանիպուլյացիաների կամ սպառնալիքների: Չեմ զարմանա, եթե Ալիևն ու Փաշինյանը միասին նոր ագրեսիա կազմակերպեն Հայաստանի դեմ և նոր տարածքներ գրավեն: Սրանից հետո Փաշինյանը շանտաժի կդիմի՝ համոզելով, որ անհրաժեշտ է գնալ հանրաքվեի, որպեսզի Ադրբեջանը լքի օկուպացված տարածքները։ Սա իր ոճի մեջ է»,- եզրափակեց քաղաքական գործիչը։