Հաղթողը պետք է լինի հայկական ֆուտբոլը. հաղթի՛ր հանուն ֆուտբոլի. Ռոբերտ Արզումանյանը՝ ՀՖՖ ընտրությունների մասին
ՍՊՈՐՏ
Հայաստանի ազգային հավաքականի նախկին պաշտպան Ռոբերտ Արզումանյանն անդրադարձել է Ֆուտբոլի ֆեդերացիայի նախագահի ընտրությունների թեմային։
«Մեր ֆուտբոլային աշխարհը կանգնած է նոր ղեկավարի ընտրության առջև, որն առաջնորդելու, ղեկավարելու և առաջ է տանելու այն իր բարեփոխումներով և կառավարմամբ։
Մի փոքր առաջ ընկնեմ և ասեմ, որ ես չունեմ կանխակալ վերաբերմունք ոչ մի թեկնածուի հանդեպ, միշտ գործել եմ հանուն արդարության և հայկական ֆուտբոլի, և հարգում եմ բոլորին, ովքեր առաջնորդվում են արժեքներով։
Ճանաչում եմ թեկնածուներին և անձնական մակարդակում համարում երկուսին էլ լավ մարդ։ Դեմ եմ գործողությունների ընդդեմ սկզբունքով առաջնորդվելուն, այլ՝ հանուն ֆուտբոլի։
Դատարկաբանություն և անընդունելի եմ համարում հանել ակումբն ընդդեմ ինչ-որ բանի կամ ինչ-որ մեկի։
Ես այժմ չեմ խոսի ծրագրերի մասին, քանի որ վստահ եմ՝ յուրաքանչյուր ծրագիր, մոդել, մեթոդիկա իրագործում են ճիշտ աշխատանքի և որն ամենակարևորն է՝ ճիշտ մարդկային ռեսուրսի, ներքին սոլիդարության շնորհիվ։
Բայց այս ամենի հիմքում ընկած է ամենակարևորը՝ մենտալիտետը․ աշխատանքային մտածելակերպ, որ պետք է ունենա հենց կառավարողը և կոնսոլիդացնի այդպես մտածող և ունակ մարդկանց, և հենց այդ մարդկային ռեսուրսով, որոնք
տիրապետում են աշխատանքին, առաջնորդվի և իրականացնի ծրագրերը։
Բայց տեսնում եմ հակառակ մտածելակերպի դրսևորումներ թեկնածուներից մեկի գործողություններում, թեկուզ և փոքր, բայց մշտապես կրկնվող։
Իսկ փոքր բաներում են հենց դրսևորվում մեծ գործեր անելու անհնարինությունը։
1.Կառավարում, առաջնորդվելով like հավաքելու, քննադատությունից (comment-ից) փախչելու մենտալիտետով, ինչի հետևանքով իրապես անհնարին է դառնում կոնսոլիդացնել և ճիշտ աշխատել նպատակներին հասնելու համար, ընտրությունդ դառնում է ձև, այլ ոչ նպատակին հասնելու միջոց։ Գործում է դեմ, այլ ոչ հանուն սկզբունքը։
2.Օբյեկտիվ գնահատական տալու ստացված և չստացված աշխատանքի անկարողություն, որի հետևանքով էներգիան և աշխատանքը ուղղվում են պատճառաբանություններ գտնելուն, պոպուլիստական քայլեր անելուն, այլ ոչ իրական պատճառները հասկանալուն, ինչը կտանի խնդիրների լուծմանը։ Չես հաղթում պրոցեսում՝ պարտված ես վերջնարդյունքում։ Նպատակը դառնում է միջոց։ Աշխատում է ընդդեմ, այլ ոչ հանուն սկզբունքը։
3.Փորձ մրցակից թեկնածուին կապել նախկին բարքերի հետ՝ այդ կերպ փորձելով կասեցնել աջակցություն ստանալու հավանականությունը շատ պարզ պատճառով։ Սակայն, նախկին բարքերը դրսևորվում են մտածելակերպով և գործողություններով, այլ ոչ բարձրաձայնելով։ Աշխատում է ընդդեմ, այլ ոչ հանուն սկզբունքը։
Անկախ ամեն ինչից՝ ես կհամարեմ հաղթանակ, եթե ընտրողն առաջնորդվի մտքի ու սրտի թելադրանքով։
Անկախ նրանից, թե ինչ է լինելու քվեարկության արդյունքում հաղթողի անուն և ազգանունը, հաղթողը պետք է լինի հայկական ֆուտբոլը։
Հաղթի՛ր հանուն ֆուտբոլի»,- իր ֆեյսբուքյան էջում գրել է Արզումանյանը։
Հայաստանի ֆուտբոլի ֆեդերացիայի նախագահի ընտրության համար առաջադրված է երկու թեկնածու` գործող նախագահ Արմեն Մելիքբեկյանը և Արաս Օզբիլիզը:
Ընտրությունները կկայանան դեկտեմբերի 23-ին:
