Ստորագրված ցուցակները չպետք է բացարձակ գաղտնի լինեն. Դավիթ Հարությունյան

Ընտրություններից հետո ստորագրված ընտրական ցուցակները չպետք է հրապարակվեն, սակայն դրանք նաեւ չպետք է բացարձակ գաղտնի լինեն: Այս մասին այսօր ԱԺ պետաիրավական հարցերի մշտաան հանաժողովում Ընտրական օրենսգրքի վերավերյալ հրավիրված քննարկմանն ասաց կառավարության աշխատակազմի ղեկավար-նախարար Դավիթ Հարությունյանը՝ պատասխանելով «Բարգավաճ Հայաստան» խմբակցության ղեկավար Նաիրա Զոհրաբյանի հարցին:

«Բոլոր շահագրգիռ անձինք, տվյալ պարագայում խոսքը վերաբերում է դիտորդների, վստահված անձանց համար այդ ցուցակները պետք է հասանելի լինեն: Դրա համար մենք առաջարկում ենք մեխանիզմ, որպեսզի դիտորդները եւ վստահված անձինք կարողանան ցուցակներին ծանոթանալու պահանջներ ներկայացնել: Մենք առաջարկում ենք նրանց տրամադրել մինչեւ 2 ժամ ժամանակ, որից նա կկարողանա նշումներ կատարել»,- նշեց Դավիթ Հարությունյանը:

Նա հստակեցրեց, որ ստորագրված ցուցակներից քաղվածքներ անելը հետապնդում է մի նպատակ՝ դատարան դիմելու պատշաճ հայց պատրաստել: «Մեր կարծիքով այս մեխանիզմը քայլ առաջ է, քանի որ շահագրգիռ կողմերը ընտրական ցուցակի հետ ծանոթանալու հնարավորություն են ստանում առանց վերահաշվարկի պահանջի»,- պարզաբանեց Դավիթ Հարությունյանը:

Նրա խոսքով՝ նոր Ընտրական օրենսգրքի նախագծում ցուցակներին ծանոթանալու համար սահմանված մինչեւ 2 ժամ ժամանակը պայմանական է: «Մենք կարող ենք միասին քննարկել եւ գտնել, թե որքան ժամանակ է դրա համար պետք»,- ասաց ՀՀ կառավարության աշխատակազմի ղեկավար-նախարարը: