ԱՄՆ-ն Իրանին կասկածել է իսրայելցի միլիարդատիրոջ նավի վրա հարձակման մեջ
ՄԻՋԱԶԳԱՅԻՆ
Իսրայելցի միլիարդատիրոջը պատկանող բեռնանավը Հնդկական օվկիանոսում ենթարկվել է հավանաբար իրանական անօդաչուի գրոհին, АР գործակալությանը շաբաթ օրը տեղեկացրել է ԱՄՆ պաշտպանության նախարարության ներկայացուցիչը։
«CMA CGM Symi» նավի վրա հարձակումը տեղի է ունեցել ուրբաթ օրը։
Գործակալության հետ անունը չնշելու պայմանով զրուցած ՊՆ ներկայացուցիչը հայտնել է, որ նավը, որը նավարկում է Մալթայի դրոշի ներքո, «միջազգային ջրերում գտնվելով՝ ենթադրաբար գրոհի է ենթարկվել Shahed-136 անօդաչուի կողմից», որը եռանկյունաձեւ է եւ ռումբ է կրում։
Նրա խոսքով՝ անօդաչուն պայթել է, ինչի հետեւանքով նավը վնասվածք է ստացել, բայց անձնակազմից ոչ ոք չի տուժել։
«Մենք շարունակում ենք ուշադիր հետեւել իրավիճակին»,- ասել է Պենտագոնի պաշտոնական ներկայացուցիչը։
Նա չի նշել, սակայն, թե ինչ հետախուզական տվյալներ են հավաքել ամերիկացի զինվորականները, որոնք թույլ կտային ենթադրել, որ գրոհի հետեւում կանգնած է Իրանը։
«Հարձակումն, ամենայն հավանականությամբ, նպատակաուղղված էր, քանի որ նավը կապված է Իսրայելի հետ Eastern Pacific Shipping ընկերության միջոցով»,- AP-ին ասել են Ambrey մասնավոր հետախուզական ընկերությունում։
Symi նավը պատկանում է Eastern Pacific Shipping սինգապուրյան ընկերությանը, որը վերահսկվում է իսրայելցի միլիարդատեր Իդան Օֆերի կողմից։
