Ընդամենը երկու գործոն է Ադրբեջանին խանգարում լայնածավալ հարձակում իրականացնել Հայաստանի վրա. փորձագետ
ՔԱՂԱՔԱԿԱՆՈՒԹՅՈՒՆԱդրբեջանին ոչ թե Սյունիքով ճանապարհներ են պետք, այլ Թուրքիայի հետ անկաշկանդ հաղորդակցություն։ Այս մասին NEWS.am -ի թղթակցի հետ զրույցում ասաց քաղաքական վերլուծաբան Արգիշտի Կիվիրյանը։
«Եվ այն, որ Բաքուն դեռ լայնածավալ հարձակում չի իրականացրել Հայաստանի վրա, Ռուսաստանի և Իրանի գործոնի արդյունքն է, որոնք դեմ են այդ միավորմանը։ Նույնիսկ ներկա իրավիճակում, երբ Ռուսաստանը թուլացած վիճակում է, այս մոդելն աշխատում է։ Եթե լինի ադրբեջանական հարձակում, դա կնշանակի, որ գոյություն ունեցող համակարգը փլուզվել է»,- ասաց նա։
Փորձագետը հավելեց, որ ՀՀ վարչապետ Փաշինյանը թյուրիմացաբար կարծում է, որ Մոսկվան այդքան հեշտությամբ կհրաժարվի 2020 թվականի նոյեմբերի 9-ի փաստաթղթից։
Նա հիշեցրեց, որ ռուս խաղաղապահները շարունակում են Արցախում գտնվել նույնիսկ հայ բնակչության բացակայության պայմաններում։
Նրա խոսքով՝ «3+3» ձևաչափը բխում է Հայաստանի շահերից, քանի որ Ռուսաստանի և Իրանի հետ կա շահերի համապատասխանություն։
«Թեհրանը նաև թույլ չի տա, որ իր հյուսիսային սահմաններում Արևմուտքի տեսքով թշնամի ուժեր ձևավորվեն։ Թուրքիան և Ադրբեջանն անհրաժեշտության դեպքում այս խաղաքարտը խաղում են: Բայց եւ այնպես, Երեւանի համար այս ձեւաչափն ամենանախընտրելին է»,- ընդգծեց վերլուծաբանը։
Նա կարծում է, որ Հայաստանը պետք է լայնածավալ լոբբինգ իրականացնի Վրաստանն այս ձևաչափին միացնելու համար։
