Շարմազանով. Հայաստանի երրորդ հանրապետություն, դասական իմաստով, այևս գոյություն չունի
ՔԱՂԱՔԱԿԱՆՈՒԹՅՈՒՆ
Հայաստանի երրորդ հանրապետություն, դասական իմաստով, այլևս գոյություն չունի, քանի որ դրա հիմքում ընկած է Անկախության հռչակագիրը և արցախյան ազատագրական պայքարը՝ Արցախյան շարժումը։ Այս մասին նոյեմբերի 17-ին հանրահավաքից առաջ լրագրողների հետ հանդիպման ժամանակ հայտարարել է Հայաստանի Հանրապետական կուսակցության մամուլի քարտուղար Էդուարդ Շարմազանովը։
Նրա համոզմամբ, դա տեղի է ունեցել այն պատճառով, որ Փաշինյանը Արցախը ճանաչել է Ադրբեջանի կազմում։
«Հայերը վտարված են Արցախից։ Փաշինյանն ու իր խումբը հայոց պատմության մեջ միակ իշխանությունն է, որին հաջողվել է ամբողջությամբ վտարել հայությանը Արցախից։ Պատմության մեջ չի եղել մի շրջան, որ Արցախում հայերը մեծամասնություն չլինեին»,- ընդգծել է ՀՀԿ մամուլի քարտուղարը։
Նա կարծում է, որ ելք միշտ կա, եթե չհանձնվես, իրատեսորեն գնահատես իրավիճակը, նպատակ դնես, միջոցներ ձեռք բերես և կամք դրսևորես այդ նպատակին հասնելու համար։
«Հակառակ դեպքում Հայաստանը կանգնած է թուրքական վիլայեթ դառնալու վտանգի առջև։
Հենց 2018-ի թուրք-ՆԱՏՕ-ական հեղաշրջումից հետո տրվեց հակահայկական գործողությունների մեկնարկը։ Հայաստանի նոր իշխանություններն անմիջապես հայտարարեցին, որ հեղափոխությունն ավելի կարևոր է, քան արցախյան շարժումը։ Բացի այդ, հաղթանակի խորհրդանիշներից մեկի՝ ԵԿՄ ղեկավարին «տուշոնկայի» գող սարքեցին։ Հետո քրեական գործեր հարուցեցին հաղթանակի ևս երկու խորհրդանիշների դեմ։ Խոսքը Սերժ Սարգսյանի ու Ռոբերտ Քոչարյանի մասին է։ Զուգահեռաբար աշխատանք տարան հայ եկեղեցին և ընտանիքի ինստիտուտը վարկաբեկելու ուղղությամբ։
Հիմա հերթը զինանշանինն է, Փաշինյանը սկսեց խոսել դրա վրա պատկերված Արարատ լեռան մասին, որը հայկական զինանշանի վրա կար նույնիսկ Ռուսական կայսրության և ԽՍՀՄ տարիներին։
Այս ամենը վկայում է այն մասին, որ Հայաստանը գնում է թուրքացման ճանապարհով»,- հավելել է նա։
