Եվրոպայի խորհրդի տեղական և տարածքային իշխանությունների կոնգրեսը դատապարտել է Ադրբեջանին և հռչակագիր ընդունել

Տեղական և տարածքային իշխանությունների կոնգրեսը խստորեն դատապարտում է սեպտեմբերի 19-20-ն Ադրբեջանի կողմից Ղարաբաղում իրականացված ռազմական գործողությունը և հռչակագիր է ընդունել։

Դրանում, մասնավորապես, նշվում է.

«Կոնգրեսը դատապարտում է Ադրբեջանի ռազմական գործողությունը Ղարաբաղում և տարածաշրջանի նախորդ տասն ամիսների շրջափակումը, որը հանգեցրեց մարդասիրական ծանր իրավիճակի, մարդկային զոհերի և ավելի քան 100,000 մարդու փախուստի։

Կոնգրեսը ճանաչում է Ադրբեջանի տարածքային ամբողջականությունը, սակայն խորը մտահոգություն է հայտնում իրավիճակի մարդասիրական հետևանքների վերաբերյալ և ողջունում է Հայաստանի իշխանությունների ջանքերը՝ ընդունելու տարածաշրջանից փախած ղարաբաղցի հայերին։

Կոնգրեսն աջակցում է ճգնաժամին արձագանքելու՝ միջազգային ջանքերին և ողջունում է այդ կապակցությամբ ՄԱԿ-ի առաքելության տեղակայումն՝ Ադրբեջանի հրավերով, ինչպես նաև Միգրացիայի և փախստականների հարցերով գլխավոր քարտուղարի և Եվրոպայի խորհրդի մարդու իրավունքների հանձնակատարի վերջին այցերը տարածաշրջան:

Կոնգրեսը.

Ցավում է ադրբեջանական ռազմական գործողության և տարածաշրջանի նախկին շրջափակման հետևանքով առաջացած իրավիճակի լուրջ հումանիտար հետևանքների համար և Ադրբեջանի իշխանություններին կոչ է անում իրականացնել 2023 թվականի սեպտեմբերի 22-ի որոշմամբ ՄԻԵԴ-ով սահմանված ժամանակավոր միջոցառումները և զերծ մնալ գործողություններից, որոնք կարող են հանգեցնել իրավիճակի հետագա վատթարացման և բնակչության հետագա արտագաղթի,

կոչ է անում ազատ արձակել Ադրբեջանում կալանավորված Ղարաբաղի բոլոր ներկայացուցիչներին, 

իր համերաշխությունն ու լիակատար աջակցությունն է հայտնում Հայաստանի տեղական իշխանություններին, որոնք ղարաբաղցիներին ընդունելու համար ջանքերի առաջնագծում են գտնվում, ողջունում է ՀՀ կառավարության կողմից արդեն իսկ ցուցաբերված օգնությունը և կոչ է անում եվրոպական այլ երկրների իշխանություններին աջակցել Հայաստանին և նրանց անհրաժեշտ մարդասիրական օգնություն տրամադրել,

հաստատում է Հայաստանի իշխանություններին աջակցելու իր պատրաստակամությունը, այդ թվում՝ տեղական համագործակցության միջոցով աջակցելու տարածաշրջանը լքած ղարաբաղցի հայերին, կարծում է, որ այս առումով հատուկ ուշադրություն պետք է դարձնել կանանց պաշտպանության ապահովմանը, հիշեցնելով Ադրբեջանի իշխանությունների խոստումները, որ Հայաստանի բնակիչների իրավունքներն ու ազատությունները կապահովվեն, ինչպես նաև նրանց վերաինտեգրման՝ հայտարարված ծրագրերը և վերահաստատում է Ադրբեջանի պատասխանատվությունը՝ երաշխավորելու Ղարաբաղի հայերի անվտանգությունը, ինչպես նաև տեղական ինքնակառավարման մարմիններ ստեղծելու իրավունքը՝ համաձայն 2002 թվականին Ադրբեջանի կողմից վավերացված ինքնակառավարման եվրոպական խարտիայի և ապահովելու նրանց անվտանգ վերադարձը տարածաշրջան նրանց համար, ովքեր ցանկանում են դա անել,

կոչ է անում Ադրբեջանի իշխանություններին ապահովել հումանիտար օգնության անարգել առաքումը տարածաշրջանում մնացածներին, այդ թվում՝ Լաչինի միջանցքի ամբողջական բացման միջոցով»։