Շահրամանյանը հարցազրույց կտա, բայց ոչ Հանրայինին

Արցախի նախագահ Սամվել Շահրամանյանը հարցազրույց տալու է, բայց ոչ հանրային հեռուստաընկերությանը, հայտնել են Արցախի ներկայացուցիչներից։ Հոկտեմբերի 20-ին Արցախի ներկայացուցչության վրա կատարված հարձակման ժամանակ Շահրամանյանը խոստացել էր, որ հրապարակավ ելույթ կունենա Հանրային հեռուստաընկերության եթերում, կպատասխանի հասարակությանը և հատկապես արցախցիներին հուզող հարցերին։ «Արցախի Հանրապետությունը չի լուծարվել, այդ փաստաթղթի հետ կապված ահագին հարցեր կան, որ ես այստեղ չեմ կարող ասել, բայց ձեզ վստահեցնում եմ, որ ոչ մի փաստաթղթով չի կարող լուծարվել ժողովրդի կողմից ստեղծված հանրապետությունը, սրա պատասխանը ես հանրային ձևով տալու եմ Հանրային հեռուստատեսությամբ»,- ասել էր Շահրամանյանը։

Գործող վարչախմբի ազդեցության տակ գտնվող Հանրայինն Արցախի նախագահին որևէ հրավեր չի ուղարկել, ավելին Արցախի նախկին իշխանություններն էլ հասկացել են, որ բնավ ցանկալի չէ հարցազրույցը տալ Հանրային հեռուստաընկերությամբ, որտեղ փորձելու են մանիպուլացնել և Շահրամանյանին ներքաշել սադրանքի մեջ, փոխարենը նախատեսվում է մեծ հարցազրույց տեսագրել սեփական ուժերով և այն հրապարակել հանրային հարթակներում և սոցցանցերում։ Այդ դեպքում Արցախի նախագահը կկարողանա պատասխանել բոլոր հուզող հարցերին և անլուրջ պոլեմիկայի մեջ չի մտնի։

Մեր աղբյուրների փոխանցմամբ՝ փաշինյանական վարչախումբը լրջորեն մտահոգված է հնարավոր հարցազրույցի բովանդակությունից, գիտակցում է, որ Շահրամանյանի խոսելու դեպքում որոշակի վտանգներ կարող է լինել ոչ միայն իրենց, այլ նաև հենց Նիկոլ Փաշինյանի համար, ուստի և փորձում են հնարավոր բոլոր միջոցներով վիժեցնել հարցազրույցը։

Փաշինյանը նաև չափազանց լրջորեն զայրացած է հոկտեմբերի 20-ի սադրանքի կապակցությամբ, բայց ոչ թե, որ նման բան է տեղի ունեցել, այլ որ նախապես իրենց պլանավորած սցենարը չեն կարողացել արդարացնել։ Դրա ետևում կանգնած Սամվել Բաբայանին նկատողություն են արել և այժմ այլ անձանց են որոնում, որոնց ձեռքով էլ կփորձեն նոր սադրանքներ հրահրել։ 

Արամ Սարիբեկյան