ՄԱՖ-ում բացատրել են Ուկրաինայում և Ղարաբաղում հակամարտությունների նկատմամբ տարբեր մոտեցումները
ՎԵՐԼՈՒԾՈՒԹՅՈՒՆՆԵՐ
Autosport.com.ru-ն գրում է, որ Միջազգային Ավտոմոբիլային ֆեդերացիայի նախագահ Մուհամմեդ բին Սուլեյեմը բացատրել է, թե ինչու Ադրբեջանը Հայաստանի հետ ռազմական հակամարտության ֆոնին դուրս չի մնացել Ֆորմուլա 1-ի օրացույցից և չի զրկվել 2023 թվականի դեկտեմբերին մրցանակաբաշխությունը կազմակերպելու իրավունքից։ «Մենք պետք է չեզոք մնանք, թե՛ կրոնական, թե՛ քաղաքական հարցերում։ Ահա թե ինչ է ասում մեր կանոնադրությունը: Ես չեմ հորինել այդ կանոնները, բայց դրանք պետք է պահպանվեն: Հակառակ դեպքում, ի՞նչ իմաստ ունեն դրանք։ Մենք ուղղակի մեզ հիմար դրության մեջ կդնենք: Ես հասկանում եմ, թե ինչ է կատարվում (Ադրբեջանի և Հայաստանի միջև)։ Բայց միևնույն ժամանակ կարող ենք նշել առնվազն 20 երկիր, որտեղ ներկայումս զինված բախումներ են տեղի ունենում։ Ի վերջո, ես ո՞վ եմ, որ ասեմ, թե ով է ճիշտ, ով է սխալ։ Ո՞վ եմ ես, որ դատեմ»,– Սուլայեմի խոսքերն է մեջբերել German Motorsport-Total հրատարակությունը:
Լրագրողների այն դիտարկմանը, որ ՄԱՖ-ը հրաժարվել է մրցարշավներ անցկացնել Ռուսաստանում և սահմանափակել ռուս ավտովարորդների մասնակցությունը 2022 թվականի փետրվարին Ուկրաինայում իրադարձությունների բռնկումից հետո, ֆեդերացիայի նախագահը պատասխանել է. «Մենք որոշում ենք ընդունել հենվելով մեր կանոնադրությանը (չեզոքությանը): Ես ինքս դեմ էի դրան։ Բայց մենք արտահերթ ժողով հրավիրեցինք և արեցինք այն, ինչ ցանկանում էին մասնակիցները։ Նրանց ձայնը գերակա էր, իսկ ես ընտրվել եմ ֆեդերացիայի ներկայացուցիչների ցանկություններն իրականացնելու համար։ Ես ինքս էլ ֆեդերացիայի ներկայացուցիչ եմ»։
Հիշեցնենք, որ 2022 թվականի օգոստոսին Ֆորմուլա 1-ի գործադիր տնօրեն Ստեֆանո Դոմենիկալին հայտարարել էր, որ Ֆորմուլա 1 առաջնությունը Ռուսաստան վերադարձնելու մասին չի կարող անգամ խոսք լինել։
Նյութը հրապարակման պատրաստեց Կամո Խաչիկյանը
