Սահակաշվիլին ջուր է պղտորում «Զանգեզուրի միջանցքի» հարցով

Սեփական երկրում կալանավորված և առողջական լուրջ խնդիրներ ունեցող Վրաստանի նախկին նախագահ Միխայիլ Սահակաշվիլին այժմ էլ իր ուղերձների նոր թիրախ է գտել՝ Հայստանի գործող իշխանություններին։ Օրեր առաջ նա գրառումով դիմել էր վարչապետի պաշտոնը զբաղեցնող Նիկոլ Փաշինյանին՝ կոչ անելով նրան հնարավորինս հեռու մնալ Ռուսաստանի նախագահ Վլադիմիր Պուտինից։ «Դուք պետք է շտապեք և դեն նետեք ցանկացած տատանում, գնաք վա բանկ, պետք է պահանջեք ռուսական ռազմակայանի անհապաղ դուրս բերում, դուրս գաք ԱՊՀ-ից, ՀԱՊԿ-ից, մաքսային միությունից և հայտ ներկայացնեք Եվրամիություն և ՆԱՏՕ»,- գրել էր Սահակաշվիլին։

Երեկ էլ նա դիմել է Հայաստանի և Ադրբեջանի իշխանություններին՝ այսպես կոչված Զանգեզուրի առավելությունները գերազանցապես ներկայացնելով հօգուտ Հայաստանի։ Նշելով, թե Ռուսաստանը խիստ շահագրգռված է հակամարտությունը սրելու մեջ՝ Սահակաշվիլին նշում է, թե պատերազմը ոչ միայն կվնասի Ադրբեջանի միջազգային վարկանիշին, այլ կարող է Հայաստանում իշխանափոխության հանգեցնել, սակայն այս հարցի այլընտրանքը լուծումներ կա, որոնք ուժի կիրառում չեն ենթադրում։ «Կցանկանայի Ադրբեջանի և Հայաստանի ղեկավարությանը կոչ անել որպես հնարավոր օրինակ դիտարկել Ուկրաինայի և Մոլդովայի միջև առկա համաձայնագիրը։ Երկու երկրները պահպանում են դրական բարիդրացիական հարաբերություններ՝ փոխադարձաբար ճանաչելով միմյանց սահմանները։ Այն սցենարում, երբ Ուկրաինային պահանջվում էր Օդեսա քաղաքից մուտք գործել դեպի Օդեսայի շրջանի հարավային հատված, Մոլդովան պատրաստակամորեն համաձայնեց վարձակալել Դնեստրով անցնող ճանապարհը: Որպես Օդեսայի նախկին նահանգապետ, ես հաճախ էի օգտվում այդ վարձակալած ճանապարհից` ուկրաինացի սահմանապահների հսկողության ներքո, երբ անհրաժեշտ էր լինում մտնել ուկրաինական Բեսարաբիա: Մոլդովան առևտրային շահեր է ստանում այս համաձայնագրից»,- գրում է Սահակաշվիլին։

Վրաստանի նախագահի այս կոչերը չափազանց վտանգավոր են և վկայում են հատկապես Արևմուտքի պատկերացումները Զանգեզուրի միջանցքի հարցով։ Մինչ գործող իշխանությունների ներկայացուցիչները համոզում են, թե Զանգեզուրի միջանցքով առավելապես շահագրգռված է Ռուսաստանը, Սահակաշվիլին գիտակցաբար բացահայտում է Զանգեզուրի միջանցքի իրական նպատակը և Արևմուտքի տեսլականը, որն ի դեպ որևէ դրական զարգացում չի խոստանում Հայաստանի համար, ընդհակառակը իր մեջ թաքցված սպառնալիքներ է պարունակում, ուստի և հարկավոր է լսել արդեն վաղուց իրեն որպես հակահայ դրսևորած Սահակաշվիլու խորհուրդները և անել հակառակը։ 

Անահիտ Գասպարյան