Նոր արտոնություններ՝ պաշտոնաթող վարչապետերին

ԱԺ արտաքին հարաբերությունների մշտական հանձնաժողովի նիստի օրակարգում ընդգրկված էր մեկ հարց, այն է՝ «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքում լրացումներ կատարելը։ 

ՀՀ ԱԳ փոխնախարար Պարույր Հովհաննիսյանը ներկայացրեց նախագիծը.

«Նախորդ քննարկման ընթացքում ներկայացրել ենք առաջարկը, այն վերաբերում է բարձրաստիճան պաշտոնատար անձանց սպասարկումը օդանավակայաններում կարգավորելուն։ Պետք է մշակվեր համապատասխան ցանկ, և այս առաջարկը լրացնում էր այս բացը։ Նախորդ անգամ մենք ստացանք նաև մի շարք առաջարկներ, որոնց մեծամասնությունը ներառել ենք այս նախագծում»,- ասաց նա։

Նախագծով սահմանվում է, որ պաշտոնական պատվիրակությունների սրահից օգտվելու իրավունք ունեն սահմանափակ թվով պաշտոնատար անձինք, որոնց ցանկը սահմանվում է վարչապետի որոշմամբ: Տարընկալումից խուսափելու և հստակեցնելու նպատակով առաջարկվում է օրենքի նախագծի 1-ին հոդվածով առաջարկվող գործող օրենքի 7.9-րդ հոդվածում լրացվող նոր՝ 5-րդ մասում հստակ սահմանել, թե ովքեր իրավունք ունեն օգտվելու Հայաստանի Հանրապետության օդանավակայանների պաշտոնական պատվիրակությունների սրահից:

Հաշվի առնելով վերոգրյալը, 1-ին հոդվածի 5-րդ մասը խմբագրվել է հետևյալ բովանդակությամբ. Սույն հոդվածի 4-րդ մասով սահմանված կարգով Հայաստանի Հանրապետության օդանավակայանների պաշտոնական պատվիրակությունների սրահից կարող են օգտվել նաև սույն հոդվածի 4-րդ մասում նշված պաշտոնատար անձանց ընտանիքի անդամները»: Նախագծի 2-րդ հոդվածի վերնագիրն առաջարկում ենք հանել՝ հիմք ընդունելով «Նորմատիվ իրավական ակտերի մասին» օրենքի 14-րդ հոդվածի 8-րդ մասի պահանջը»:

Նշենք, որ ըստ նախագծի՝ 2018 թվականից հետո պաշտոնաթող վարչապետերը և նրանց ընտանիքի անդամները ևս ներառվում են այս ցանկում։