Փաշինյանի ելույթը և Սահակաշվիլիի խորհուրդները. Նոր աղետի սպասումով

Հայաստանի վարչապետի պաշտոնը զբաղեցնող Նիկոլ Փաշինյանը երեկ կես ժամից ավել ելույթ է ունեցել Եվրախորհրդարանի նիստում և վիճահարույց մի ամբողջ շարք հայտարարություններ արել, որոնք կարող են լուրջ հետևանքներ ունենալ Հայաստանի համար։

Փաշինյանը մեղադրանքների տարափ է տեղացել Ռուսաստանի և Հավաքական անվտանգության պայմանագրի կազմակերպության հասցեին, հայտարարել, թե դաշնակիցներն ամենևին չօգնեցին Հայաստանին, ավելին մեկ այլ դրվագում էլ նա, առանց անուններ նշելու Ռուսաստանին ընդհուպ մեղադրել է Հայաստանում ներքաղաքական իրավիճակը սրելու, իշխանափոխություն ծրագրելու և դրածո կառավարություն նշանակելու ձեռնարկելու մեջ։

Այն, որ Փաշինյանը Եվրախորհրդարանի ամբիոնն օգտագործել էր Ռուսաստանի դեմ հարձակումներ իրականացնելու համար, երկրորդ կարծիք լինել չի կարող և գործող վարչախմբի սպասարկուների ուրախությունը ելույթից հետո հնչող ծափերի վերաբերյալ լիովին անտեղի է, Փաշինյանին ընդամենը ծափահարել են հակառուսական հերթական արկածախնդրության համար, պատգամավորներին բնավ չի հետաքրքրում, թե ինչ հետևանքներ կունենա Փաշինյանի չմտածված քայլերը, նրանց համար առաջնային է հակառուսական հայտարարությունները։

Ի դեպ Փաշինյանի երեկվա հայտարարությունից հետո Վրաստանի նախկին նախագահ, ներկայումս կալանքի տակ գտնվող Միխայիլ Սահակաշվիլին ուղերձով դիմել է Նիկոլ Փաշինյանին՝ զգուշացնելով Ռուսաստանի նախագահ Վլադիմիր Պուտինից բխող սպառնալիքների մասին։ Նշելով, որ Փաշինյանն իշխանության է եկել ժողովրդավարական ընդվզումների Պուտինի տերմինաբանությամբ գունավոր հեղափոխության արդյունքում, Սահակաշվիլին վստահեցրել է, թե Պուտինը երբեք չի ների ու չի ներելու Փաշինյանին, ավելին, հատկապես Հռոմի ստատուտը վավերացնելուց հետո նա Փաշինյանի թշնամին է արյամբ և ջանալու է տապալել իր ունեցած բոլոր հնարավորություններով, ներքին անկարգություններով, ռազմական գործողությունների խրախուսմամբ։ Սահակաշվիլին նաև հայտարարել է, թե Նիկոլ Փաշինյանը գալով իշխանության ձախողել է բոլոր բարեփոխումները, սակայն դեռևս շանս ունի։ Այն, որ Արևմուտքի աջակցությունը վայելող Սահակաշվիլին փորձելու է ոչ միայն Վրաստանը ապակայունացնել, այլ նաև Հայաստանը, թերևս հասկանալի է յուրաքանչյուրին, իսկ Նիկոլ Փաշինյանը շարունակում է իր հակառուսական հայտարարություններով նոր վտանգներ բերել Հայաստանի համար։

Սիրան Նասիբյան