Ընդդիմությունը հիմա էլ նոր ձևաչափ է մտածում պայքարի համար

Ընդդիմադիր շարժում ձախողած խորհրդարանական ընդդիմադիրները և նրանց ստեղծած «Ազգային կոմիտեն» որոշել են վերափոխվել, վերակազմակերպվել և ընդդիմադիր շարժման նոր ձևաչափ սահմանել։ Օրեր առաջ Ազգային կոմիտեի նախաձեռնությամբ կազմակերպվել է Հայաստանի անվտանգության սպառնալիքները, դրանց չեզոքացման ուղիները, ընդդիմադիր շարժման հետագա կազմակերպումն ու գործունեությանը թեմայով քննարկում, որին մասնակցել են գործող ընդդիմադիր քաղաքական ուժերի մի քանի տասնյակ ներկայացուցիչներ, անհատ հանրային գործիչներ։

Ազգային կոմիտեի համակարգող Վազգեն Մանուկյանը հանդես է եկել ելույթով, քննարկել արտաքին և ներքին միջավայրից բխող անվտանգության սպառնալիքները, ՀՀ ապագա իշխանությունների հրատապ առաջնահերթությունները, ընդդիմադիր շարժումների գնահատականը և հանրային պահանջներ ընդդիմությունից, ինչպես նաև՝ ընդդիմադիր նոր շարժման կողմից հանրային հաղորդակցության թեզերը, սկզբունքները և եղանակները։

2020 թվականի 44-օրյա պատերազմից հետո ընդդիմությունը բազմաթիվ առիթներ է ունեցել Նիկոլ Փաշինյանին տապալելու, սակայն բոլոր դեպքերում «բարեհաջող» կերպով ձախողվել է այդ առաքելությունը, ինչից հետո ընդդիմության ընտրազանգվածը և նրանց հավատացող ու արմատական տրամադրված մարդիկ լրջորեն հիասթափվել են, սոցիալական ցանցերում ընդդիմության հասցեին մեծամասամբ քննադատական խոսքեր են, գրեթե ավելի շատ, քան անգամ Փաշինյանի հասցեին։

Ի վերջո 2021 թվականին խորհրդարանական ընտրություններում «Հայաստան» և «Պատիվ ունեմ» դաշինքներին քվե տված մարդիկ բնավ էլ չէին ցանկանում, որպեսզի երեք տասնյակից ավելի պատգամավորներ նստեն Ազգային ժողովում և վարչապետի պաշտոնը զբաղեցնեղ անձին դիմեն «պարոն վարչապետ» դիմելաձևով, ուստի և ընդդիմության նոր վերակազմակերպման ու նոր ձևաչափի սահմանման խիստ անհրաժեշտություն կա, բայց այս առումով էլ մեկ շատ էական հանգամանք՝ հարկավոր են չվարկաբեկված և կամային գործիչներ, ոչ այն անձինք, որոնք արդեն մեկ կամ մի քանի անգամ ձախողել են ընդդիմության պայքարը։

 Թերեզա Հարությունյան