Ի՞նչ է սպասվում Երևանի ավագանու առաջին նիստում

Եկող շաբաթ՝ հոկտեմբերի 10-ին, գումարվելու է Երևանի ավագանու առաջին նիստը, որի ընթացքում էլ նոր քաղաքապետ կընտրեն։ «Քաղաքացիական պայմանագիրն» ակտիվորեն պատրաստվում է առաջին նիստին՝ վստահ լինելով, որ առանց խոչընդոտների Տիգրան Ավինյանին կհաջողվի Երևանի քաղաքապետ ընտրվել։

«Հանրային ձայն» կուսակցության՝ ավագանու նիստը չբոյկոտելու որոշումից հետո գործող իշխանությունները, կարծես, այլ խոչընդոտների չեն հանդիպի։ Առաջին անգամ, սակայն, ավագանու անդրանիկ նիստը հանդիսավոր պայմաններում չի լինի։ Նախկինում առաջին նիստերը կայանում էին ոչ թե խորհրդակցությունների դահլիճում, այլ Երևանի քաղաքապետարանի միջանցքում, նորընտիր քաղաքապետն էլ երդում էր տալիս, իսկ նիստին մասնակցում էին ոչ միայն ավագանու անդամները, այլ նաև վարչապետը, կառավարության անդամներ, հյուրեր։ Այս անգամ որոշվել է զերծ մնալ նման հանդիսավորությունից՝ վախենալով, որ Նիկոլ Փաշինյանի մասնակցության դեպքում կարող են տհաճ միջադեպեր գրանցվել։

Թեև «Հանրային ձայնը» համաձայնվել է ներկայանալ նիստին, բայց ՔՊ-ն վստահություն չունի, որ Վարդան Ղուկասյանի կողմնակիցները չեն չփախցնի իրենց տոնը։ Քաղաքապետ ընտրելուց հետո արդեն սկսելու են պաշտոնների բաժանումները, կընտրեն նաև առաջին փոխքաղաքապետ, ըստ ամենայնի, «Հանրապետություն» կուսակցությունից։

Թեև խոսվում է Անի Խաչատրյանի թեկնածության մասին, բայց մեր աղբյուրները չեն բացառում, որ Արամ Զավենի Սարգսյանն այլ թեկնածուի առաջարկի՝ ընտրական ցուցակի երկրորդ համար Սարգիս Մադաթյանին, իսկ Անի Խաչատրյանը դառնա խմբակցության ղեկավարը։

Ի դեպ, դա կարող է լուրջ խմորումներ առաջացնել Փաշինյանի կցորդը դարձած «Հանրապետությունում», որտեղ կարծում են, թե պատահաբար բերված և ցուցակի երկրորդ տեղով ավագանի անցած Մադաթյանն արժանի չէ առաջին փոխքաղաքապետ դառնալ։ «Հանրապետությունը» նաև հավակնում է երեք վարչական շրջանների ղեկավարների պաշտոններին, այս օրերին վերջին բանակցություններն են այդ հարցով։

Ընդդիմությանը պաշտոններ բնականաբար չեն տրվելու։

Թամարա Գալստյան