Փաշինյանի հերթական հակառուսական քայլը
ՎԵՐԼՈՒԾՈՒԹՅՈՒՆՆԵՐ
Գրանադայում կայացած հանդիպումներից հետո Հայաստանի գործող վարչախումբը շարունակում է իր հակառուսական քաղաքականությունը։ Հայաստանը չի մասնակցում հոկտեմբերի 6-ին Ղրղըզստանում մեկնարկած ՀԱՊԿ-ի զորավարժություններին։
«Անխախտ եղբայրություն» կոչվող զորավարժությունները անցկացվում են Ղրղըզստանի հյուսիսում գտնվող Բալիկչի քաղաքի մոտ։ Ղրղըզստանի պաշտպանության նախարարությունը հաղորդում է, որ ՀԱՊԿ-ի անդամ մյուս հինգ երկրների մասնակցությամբ զորավարժությունները շարունակվելու են մեկ շաբաթ։ Երևանը ՀԱՊԿ-ին մեղադրում է Հայաստանի տարածքի վրա Ադրբեջանի հարձակումներին պատշաճ չարձագանքելու, կազմակերպության անդամ Հայաստանին անօգնական թողնելու մեջ։ Իսկ հոկտեմբերի 13-ին Բիշքեկում կայանալու է ԱՊՀ գագաթնաժողովը, Փաշինյանն առանձնապես մտադիր չէ մեկնել Ղրղըզստան, լավագույն դեպքում գագաթնաժողովին մասնակցի տեսակապի միջոցով։
ՌԴ նախագահի օգնական Յուրի Ուշակովն այդ մասին ասել է՝ պատասխանելով Բիշքեկում Վլադիմիր Պուտինի և Նիկոլ Փաշինյանի հանդիպման հնարավորության մասին հարցին։ Այն, որ Փաշինյանը բնավ չի ցանկանում դեմ առ դեմ առնչվել Վլադիմիր Պուտինի հետ, մեծ գաղտնիք չէ․ Հռոմի ստատուտի վավերացումից հետո ոչ միայն Փաշինյանը, այլև ՀՀ կառավարության մանոր ու մեծ բազմաթիվ պաշտոնյաներ փորձելու են խուսափել հանդիպումներից, քննադատությունից և սպառնալիքներից։ Ռուսաստանը պարզ հասկացրել է, որ թշնամական քայլ է որակում Հռոմի ստատուտի վավերացումը։
Ի դեպ,, երեկ ռուսական պետական ՏԱՍՍ գործակալությունը տեղեկություն տարածեց, թե ՌԴ ՊՆ պատվիրակություն է ժամանելու Երևան՝ քննարկելու Արցախից ռուս խաղաղպահների դուրսբերման ժամկետներն ու եղանակները։ ՀՀ ՊՆ-ն անմիջապես հայտարարեց, թե նման այցի մասին տեղեկություն չունեն, որևէ հանդիպում պլանավորված չէ։ Ռուսական կողմը ստիպված էր հերքել իրենց պետական գործակալությանը։ «Իրականությանը չի համապատասխանում մի շարք լրատվամիջոցների տարածած տեղեկությունն այն մասին, թե Ռուսաստանի պաշտպանության նախարարության պատվիրակությունը Բաքվում կամ Երևանում քննարկում է Ղարաբաղից ռուսական խաղաղապահ զորախմբի դուրսբերման հարցը։ Խոսքը խաղաղապահների ընթացիկ գործունեության վերաբերյալ ծրագրված շփումների մասին է»,- նշել է Ռուսաստանից։
Բնականաբար, ՏԱՍՍ-ի տեղեկությունը բոլորովին կեղծ չէր, պարզապես, ռուսական կողմը հերթական անգամ ստուգում էր Հայաստանի իշխանությունների արձագանքը։
Անուշ Կիրակոսյան
