Ինչպե՞ս ձախողվեց Գրանադան

Մինչ Հայաստանի իշխանությունները փորձում են համոզել հանրությանը, թե Գրադանայում կայացած քառակողմ հանդիպումն ու ընդունված հայտարարությունը հաղթանակ են, անգամ արևմտյան առաջատար պարբերականներն են արձանագրում Գրանադայի ձախողումը։

«Պոլիտիկո» պարբերականի գնահատմամբ, Գրանադայում 50 եվրոպացի առաջնորդների, տասնյակ օգնականների և լրագրողների մասնակցությամբ գագաթնաժողովը հիասթափեցնող է եղել, քանի որ մասնակիցները չեն կարողացել որևէ էական առաջընթաց գրանցել՝ լուծելու Եվրոպայի շեմին կանգնած հակամարտություններն ու մյուս տարածաշրջանային խնդիրները։

Ֆրանսիայի նախագահ Էմանուել Մակրոնի նախագծի`«Եվրոպական քաղաքական համայնք»-ի երրորդ հանդիպումը դիտարկվում էր որպես պատերազմող Հայաստանի և Ադրբեջանի միջև խաղաղություն հաստատելու, Բալկաններում լարվածությունը թուլացնելու և Եվրոպայի անվտանգության մասին ռազմավարական զրույց վարելու հնարավորություն: Սակայն մասնակիցներին չի հաջողվել առաջընթաց գրանցել հակամարտության կարգավորման գործում՝ առանցքային դերակատարների բացակայության պայմաններում, գրում է ամերիկյան հրատարակությունը: Լեռնային Ղարաբաղում մարդասիրական ճգնաժամի կարգավորմանն ուղղված քայլեր ձեռնարկելու վերաբերյալ մասնակիցների հույսն ի չիք է դարձել, երբ և՛ Ադրբեջանի նախագահ Իլհամ Ալիևը, և՛ Թուրքիայի նախագահ Ռեջեփ Թայիփ Էրդողանը որոշել են չմասնակցել հավաքին:

ԵՄ ղեկավարները հույս ունեին կազմակերպել Ադրբեջանի կողմից Լեռնային Ղարաբաղում հարձակում սկսելուց և դրա հետևանքով ավելի քան 100,000 փախստականի արտագաղթից հետո առաջին Փաշինյան-Ալիև հանդիպումը: Ադրբեջանը մեղադրել է Ֆրանսիային բանակցություններում կողմնակալության համար, սակայն, ի վերջո, համաձայնել է բանակցել, բայց միայն ԵՄ հովանու ներքո՝ Բրյուսելում:

«Պոլիտիկո»-ից բացի, այլ պարբերականներ ու վերլուծաբաններ ևս արձանագրում են, որ որևէ շոշափելի առաջընթացի հասնել չի հաջողվել, իսկ Շոլցի, Մակրոնի ու Միշելի հայտարարությունը պարզապես իրենց դեմքը փրկելու միջոց էր։

Ըստ էության, սպառնալիքները մեր տարածաշրջանում պահպանվում են, իսկ ՀՀ իշխանությունները՝ Փաշինյանի գլխավորությամբ, նոր վտանգներ են բերում արդեն Հայաստանի համար։ 


Ռոբերտ Խաչատրյան