Չեղած բանը հաղթանակ ներկայացնելու փաշինյանական ցինիզմը

Միայն անհուն ցինիզմով տառապող փաշինյանական կերպարները կարող են համոզել, թե երեկ Գրանադայում տեղի ունեցած քառակողմ հանդիպումը հաղթանակ էր Հայաստանի համար։ Հիշեցնենք, Նիկոլ Փաշինյանը երեկ հանդիպել է Եվրոպական խորհրդի նախագահ Շառլ Միշելին, Ֆրանսիայի նախագահ Էմանուել Մակրոնին և Գերմանիայի կանցլեր Օլաֆ Շոլցին։ Հանդիպմանը պետք է մասնակցեր նաև Ադրբեջանի նախագահ Իլհամ Ալիևը, սակայն վերջին պահին նա պարզապես հրաժարվել է մեկնել՝ մինչ այդ պահանջելով, որ հանդիպմանը մասնակցի նաև Թուրքիայի նախագահ Էրդողանը, ինչին դեմ էին եղել հատկապես Ֆրանսիան և Գերմանիան։

Երեկ կայացած քառակողմ հանդիպումից հետո կողմերը հայտարարություն են տարածել, որը բացառապես վերջին շրջանում Հայաստանի արտահայտած նարատիվների ամբողջությունն է և ոչինչ ավելի։ Ընդսմին եվրոպացի առաջնորդներն ընդգծում են իրենց անսասան աջակցությունը Հայաստանի անկախությանը, ինքնիշխանությանը, տարածքային ամբողջականությանը, միաժամանակ գրավոր արձանագրում, որ Հայաստանի տարածքը պետք է լինի 29800 քառ. կմ, իսկ Ադրբեջանինը՝ 86600 քառ. կմ, այն, ինչ ավելի վաղ արձանագրվել էր Պրահայում, և որը լուրջ խնդիր է դարձել Հայաստանի համար։

Ավելին, փաշինյանական սպասարկուները երեկ փորձում էին համոզել, թե անկլավների մասին որևէ քննարկում տեղի չի ունեցել։ Իհարկե, որևէ կարիք չկար հերթական անգամ ֆիքսելու անկլավների հարցը, հատկապես, որ ավելի վաղ Փաշինյանն իր հայտարարած 29800 քառ. կմ մեջ արձանագրել էր այդ անկլավները՝ միևնույն ժամանակ խոսելով Արծվաշենի մասին։

Գրանադայի հանդիպումը ստեղծված աշխարհաքաղաքական պայմաններում ոչ լավ էր, ոչ էլ առանձնապես վատ, պարզապես փորձ էր սպիտակեցնելու Շառլ Միշելի, Մակրոնի և Օլաֆ Շոլցի դեմքը, այն պայմաններում, երբ Ադրբեջանի նախագահը հանդգնություն է ունենում ընդհանրապես չներկայանալ քառակողմ հանդիպմանը, ավելին մեղադրանքներ հասցեագրել Ֆրանսիային, ուստի և իսպանական Գրանադայում ընդամենը թեթև փաղաքշել են Նիկոլ Փաշինյանին՝ փորձելով նրա տարբեր ժամանակներում արած հայտարարությունները դարձնել մեկ փաստաթուղթ, որը որևէ առարկայական նշանակություն չունի։

Նարինե Բեգլարյան