Ալիևը Գրանադա չի մեկնի. Փաշինյանն առաջ է մղում իր ձախողված օրակարգը

Ադրբեջանի նախագահ Իլհամ Ալիևը հրաժարվել է մեկնել Իսպանիա՝ մասնակցելու Գրանադայում նախատեսված հնգակողմ հանդիպմանը, որտեղ կողմերը պատրաստվում էին քննարկել Հայաստանի և Ադրբեջանի միջև խաղաղության պայմանագիրը։ Բաքվից միայն հաստատել են տեղեկությունը, իսկ պատճառների մասին չեն նշել, թեև ադրբեջանական լրատվամիջոցները պնդում են, որ Ադրբեջանի հիմնական դժգոհությունը հնգակողմ հանդիպմանը Ֆրանսիայի մասնակցությունն է և Փարիզի վերջին հայտարարությունները Հայաստանին աջակցելու վերաբերյալ։

Նշվում է նաև, որ ադրբեջանցիները պահանջել են Գրանադայում կայանալիք հանդիպմանը ներգրավել նաև Թուրքիային, ինչին ընդդիմացել են Պաշտոնական Բեռլինն ու Փարիզը։ Երեկ նաև տեղեկություն է տարածվել, որ Իսպանիա չի մեկնելու Թուրքիայի նախագահ Ռեջեփ Թայիփ Էրդողանը, իբր հիվանդացել է հարբուխով։

Թուրքիայի իշխող «Արդարություն և զարգացում» կուսակցության խոսնակ Օմեր Չելիքը գովել է Ադրբեջանին Գրանադայի հանդիիպմանը չմասնակցելու համար, նշել, թե ղարաբաղյան խնդրի լուծումն առանց Էրդողանի մասնակցության անհնար է։ Ի տարբերություն Ադրբեջանի՝ Հայաստանը Գրանադա մեկնելու է բավականին մեծ պատվիրակությամբ։ Վարչապետի պաշտոնը զբաղեցնող Նիկոլ Փաշինյանը երեկ Ազգային ժողովում հայտարարել է, թե իրենք ակնկալում էին ինչ-որ փաստաթուղթ ստորագրել, իսկ այժմ, երբ Ադրբեջանը չի ներկայանում, Եվրոպական առաջնորդների գագաթնաժողովում ներկայացնելու են Հայաստանի դիրքորոշումները։

Գրանադայի հանդիպումը սպառնում էր դառնալ լրջագույն փորձաքար՝ հաշվի առնելով, որ Հայաստանի իշխանություներն իրենց տապալված խաղաղության դարաշրջանի օրակարգը մղում են նույնիսկ այսօր Արցախն ամբողջությամբ հայաթափելու պայմաններում, և Փաշինյանն առիթը բաց չի թողնում Արևմուտքի հետ իր հարաբերությունները սերտացնելու, առավել ևս, որ հակառուսական նոր ալիք բարձրացնելու և այդ հանգամանքն օգտագործելով Հավաքական Արևմուտքի «աչքի լույսը» դառնալու համար պատրաստ է ցանկացած հակահայ գործողության։

Անահիտ Մանուկյան