Ռուբեն Վարդանյանի կալանավորումը կարող է մնալ Ադրբեջանի կոկորդին

Արցախի նախկին պետնախարար Ռուբեն Վարդանյանի ձերբակալությունը որքան էլ աղմկահարույց էր և անսպասելի, այնքան էլ կարող է մնալ հենց Ադրբեջանի կոկորդին։ Եթե Արցախից կալանավորված մյուս անձանց դեպքում միջազգային հանրությունն առանձնապես շահագրգռված չէր Ադրբեջանին փաստի առաջ կանգնեցնելու և պատասխան պահանջելու, ապա Ռուբեն Վարդանյանի պարագան փոքր-ինչ այլ է։

Վարդանյանն աշխարհում հայտնի գործարար է, բազմաթիվ մարդասիրական և բարեգործական նախաձեռնություններ իրականացրած, թե՛ Հայաստանում, թե՛ Եվրոպայում, թե՛ այլ մայրցամաքներում, ուստի և նրա համար հնչող ձայներն ավելի բարձր են և ավելի ազդեցիկ։ Վարդանյանի չորս զավակներն օգնության կոչով դիմել են համաշխարհային հանրությանը, ասել, թե տեղեկություններ չունեն իրենց հոր վիճակի մասին. «Մենք՝ Ռուբեն Վարդանյանի չորս զավակներս, դիմում ենք համաշխարհային առաջնորդներին, իրավապաշտպաններին, լրատվամիջոցներին, խնդրելով օգնել մեր հորը, Ադրբեջանի տարածքում բանտարկությունից ազատելու գործում, քանի որ նա կալանավորվել է, մենք կապ չունենք նրա հետ և չենք կարող պարզել, թե ինչ վիճակում է, մենք չգիտենք, թե ինչպես են հիմա նրա հետ վարվում, մենք վախենում ենք նրա կյանքի և առողջության համար»,- ասվում է զավակների հայտարարության մեջ։

Վարդանյանի ազգականները նշում են, թե չեն ցանկանում, որ նա տարածաշրջանում քաղաքական հակամարտության հերթական զոհը դառնա, հավաստիացնում են, որ Ռուբեն Վարդանյանի առաքելությունը միշտ եղել է հակամարտության թուլացումն ու խաղաղ ելքի որոնումը։ Վարդանյանը, որ ձերբակալվել էր սեպտեմբերի 27-ին Հակարիի կամրջի մոտ, մեղադրվում է մի շարք հոդվածներով, նրա համար խափանման միջոց է ընտրվել կալանքը՝ 4 ամսով։

Թե ի՞նչ նկատառումներով է Ադրբեջանը կալանավորել Ռուբեն Վարդանյանին, դեռևս պետք է պարզել, բայց այն, որ Բաքուն օգտագործելու է նախկին պետնախարարին տարատեսակ զիջումներ կորզելու հարցում, որևէ կասկած չի հարուցում։ Այդուհանդերձ, շնորհիվ իր բավական ազդեցիկ և աշխարհում հայտնի ընկերների, Ռուբեն Վարդանյանը բոլոր շանսերն ունի, նույնիսկ Բաքվի բանտում գտնվելով, լուրջ քաղաքական գործոն դառնալու։

Գայանե Սարիբեկյան