Կառավարությունում պաշտոնանկությունները չեն ուշանա

Փաշինյանը մտադիր է փոփոխություններ իրականացնել Կառավարության կազմում։ ՔՊ մեր աղբյուրի փոխանցմամբ՝ ամենաուշը Երևանի քաղաքապետի պաշտոնում Ավինյանի ընտրությունն ամրագրելուց հետո, Փաշինյանը սկսելու է իսկական զտումներ իրականացնել սեփական Կառավարության կազմում և խմբակցությունում։ Մասնավորապես, փոխվարչապետերից մեկը, մի քանի նախարարներ հրաժեշտ են տալու իրենց պաշտոններին։

Մեր աղբյուրը հայտնեց, որ առայժմ որևէ պաշտոնյա հստակ չգիտի, արդյոք կմնա՞, թե՝ ոչ։ Հաշվի առնելով Փաշինյանի փոփոխական բնավորությունը՝ կարելի է ենթադրել, որ ինքն էլ որևէ մեկին հստակ չի ասել՝ արդյոք շարունակելու՞ են իրենց պաշտոնավարումը, թե՝ ոչ։ Մասնավորապես մեր աղբյուրը նշեց, որ առնվազն երկու նախարարներ՝ տարածքային կառավարման և ենթակառուցվածքների նախարար Գնել Սանոսյանն ու էկոնոմիկայի նախարար Վահան Քերոբյանը հաստատ հեռացվելու են իրենց պաշտոններից։

Փաշինյանը նույնիսկ համապատասխան թեկանծուներ է գտել նրանց փոխարեն նշանակելու։ Ընդհանուր առմամբ Նիկոլ Փաշինյանը ցանկանում է Կառավարության ամբողջ կազմը կիսով չափ թարմացնել՝ այդ կերպ հանրությանը նաև «մեսիջ» հղելով, թե որոշել է ի վերջո լուրջ աշխատանք տանել տնտեսական և քաղաքական հարցերով։ Լրջագույն ճնշման տակ են գտնվում նաև Ազգային ժողովի խմբակցության անդամները, նրանց հստակ զգուշացվել է, որ եթե չակտիվանան և չաջակցեն կուսակցության քաղաքական կուրսին, ինչպես նաև, եթե փորձեն Հռոմի ստատուտի կամ այլ առանցքային հարցերում հակադրվեն կուսակցության գծին, ապա հրաժեշտ են տալու իրենց մանդատներին, ընդ որում՝ ինքնակամ։ Բանն այն է, որ Փաշինյանը դեռևս ընտրություններից առաջ յուրաքանչյուրից ստորագրված թուղթ է վերցրել, որի վրա ընդամենն ամիս ամսաթիվն են գրելու և ուղարկելու են Ազգային ժողով, պատգամավորին մանդատից զրկելու համար։

Անահիտ Ղազարյան