Ավինյանի «պյուռոսյան» հաղթանակը

Երևանի ավագանու նոր ընտրություններ, ամենայն հավանականությամբ, տեղի չեն ունենա։ Երևանի նոր քաղաքապետին կընտրի «Դոգ» մականունով Վարդան Ղուկասյանը՝ «Հանրային ձայն» կուսակցության ղեկավարը։ Օրեր առաջ «Ազգային առաջընթաց» կուսակցության քաղաքապետի թեկնածու Հայկ Մարությանը նշեց, թե ընդդիմության մեջ կոնսենսուսի հասնել չի հաջողվել և հարկավոր է, որպեսզի ընդդիմադիր կուսակցությունները չմասնակցեն ավագանու նիստին և բոյկոտեն այն, որպեսզի քվորում չլինի։ Գրեթե նույնանման հայտարարություն տարածեց նաև «Մայր Հայաստան» դաշինքը, եթե «Հանրային ձայն» կուսակցությունը ևս հայտարարում էր բոյկոտի մասին, ապա գործող իշխանություններին չէր հաջողվելու հավաքել անհրաժեշտ 33 մասնակիցներն ավագանու նիստի համար և ստիպված կլինեին անց կացնել ընտրությունների երկրորդ փուլ, սակայն ինչպես սպասելի էր Վարդան Ղուկասյանը հայտարարեց, թե երկրորդ փուլ չի գնալու, զուտ նրա համար, որ չպիտի լինի Հայկ Մարությանի ասածը։ «Ես՝ որպես ընդդիմություն, ավելի նախընտրում եմ, որ ռոբասերժական կլանը չամրապնդվի, քան թե Ավինյանը չվերարտադրվի»,- փաշինյանական «նախկին-ներկա» դիսկուրսն է զարգացրել Ղուակսյանը:

Սոցցանցերում հայհոյախոսությամբ աչքի ընկնող և արտերկրում գտնվող Ղուկասյանը, որի նկատմամբ միջազգային հետախուզում է հայտարարվել, ավագանու ընտրություններից հետո տևական ժամանակ տարբեր պաշտոններ էր ուզում Հայկ Մարությանից։ Վերջինս, սակայն, հրաժարվել էր կատարել Ղուկասյանի պահանջները։ Ըստ ամենայնի գործող իշխանություններին կհաջողվի քաղաքապետ ընտրել, դրա համար որևէ բան չզիջելով Վարդան Ղուկասյանին, կամ էլ այդ զիջումները կլինեն քրեական գործերը կարճելու, Ղուկասյանի կալանավորված գործընկերոջը՝ Արտակ Գալստյանին և ազգականներին ազատ արձակելու դիմաց, իսկ գործող իշխանություններն օրեր անց «կամրագրեն» իրենց պյուռոսյան հաղթանակը Երևանի ավագանու ընտրություններում։

Փաստենք, որ այս ողջ ընթացքում գործող իշխանությունները Հայկ Մարությանին տարբեր մեղադրանքներ էին առաջադրում՝ իբր նախկինների հետ համագործակցելու մեջ, սակայն հենց իրենք էլ «փառահեղ» հաղթանակ են տանում։

Քնար Գրիգորյան