Միրզոյանի դեմարշը. ո՞ւմ է ուզում Փաշինյանը ԱԳ նախարար նշանակել

Արտգործնախարար Արարատ Միրզոյանը լրջորեն մտածում է հրաժարական տալու մասին՝ որպես դեմարշ Նիկոլ Փաշինյանի վերջին վտանգավոր արարքի։ 2020թ.-ից հետո Փաշինյանը փաստացի երկու անգամ է «փուռը տալիս» Արարատ Միրզոյանին։ Եթե առաջին դեպքում նա դաժան ծեծի ենթարկվեց 2020թ. նոյեմբերի 9-ի, լույս 10-ի գիշերը, ապա այս դեպքում Փաշինյանը խայտառակ արեց իր նշանակած արտգործնախարարին։

Մինչ Հայաստանի արտգործնախարար Արարատ Միրզոյանը ՄԱԿ Անվտանգության խորհրդի նիստում մանրամասն և բավականին կոշտ շեշտադրումներով ներկայացնում էր ադրբեջանական վայրագությունները, Փաշինյանը դրանից մի քանի ժամ առաջ Երևանում այլ պատկեր էր նկարագրում՝ պնդելով՝ «արցախցիների կյանքին ուղիղ սպառնալիք չկա»։ Հայաստանի վարչապետի պաշտոնը զբաղեցնող անձի այս հայտարարությունն Ադրբեջանի արտգործնախարար Ջեյհուն Բայրամովի ելույթի մեխն էր դարձել՝ լուրջ խաղաթուղթ դառնալով ադրբեջանցիների ձեռքին։ Դա էր պատճառը, որ Արարատ Միրզոյանը ՄԱԿ ԱԽ նիստում ցուցադրաբար հեռացավ Բայրամովի ելույթի ժամանակ։

Ըստ ՔՊ մեր աղբյուրների, Միրզոյանի այդ քայլը հարուցել է Ադրբեջանի և Թուրքիայի իշխանությունների զայրույթը, որոնք կոշտ դիտողություններ են արել Նիկոլ Փաշինյանին։ Այժմ էլ Արարատ Միրզոյանը մտադիր է հրաժարական տալ՝ այդկերպ ցույց տալով, որ համաձայն չէ Փաշինյանի վարած քաղաքականության հետ։ Նաև չի ցանկանում հերթական քավության նոխազը դառնալ Փաշինյանի ձեռքում։

«Քաղպայմանագրում» արդեն շրջանառվում է հնարավոր նոր ԱԳ նախարարի անունը։ Նա ծագումով արցախցի, բայց բոլոր արժեհամակարգերը դավաճանած ԱԽ քարտուղար Արմեն Գրիգորյանն է։ Նախորդ անգամ արևմուտքի գործակալ Գրիգորյանին նախարար նշանակել չհաջողվեց Ռուսաստանի դիմադրության արդյունքում, իսկ այժմ, երբ Փաշինյանը մտադիր է ամեն գնով սրել հայ-ռուսական հարաբերությունները, այդ հանգամանքը հաշվի չեն առնելու։

Արմեն Գրիգորյանը գործող վարչախմբի դավաճանական գծի ճարտարապետներից մեկն է, Փաշինյանի ամենակեղտոտ հանձնարարությունները կատարելու հարցում էլ որևէ կաշկանդվածություն չունի։

Կարեն Պետրոսյան