Ուսանողության պայքարը կատաղեցրել է Փաշինյանին. սև ամպեր ԿԳՄՍ նախարարի գլխին

Նիկոլ Փաշինյանի բոլոր մահացու վախերին ավելացել է ևս մեկը։ Ուսումնական հաստատությունների ուսանողների զգալի մասն ակտիվորեն միացել է նոր համաժողովրդական շարժմանը և մասնակցում են ոչ միայն երեկոյան հանրահավաքներին, այլև ցերեկը տարբեր փողոցներ փակելու ակցիաներին։ Այս հանգամանքը լրջորեն ահաբեկել է Նիկոլ Փաշինյանին, ով այդ կապակցությամբ իր ողջ հերսը թափել է ԿԳՄՍ նախարար Ժաննա Անդրեասյանի վրա։

Մեր աղբյուրների փոխանցմամբ՝ նախօրեին նա անձամբ զանգահարել է նախարարին, ամենավերջին խոսքերով նրան շշպռել, հայտարարել, թե չի տիրապետում իրավիճակին, իսկ նրա նշանակած ռեկտորները ոչինչ չեն կարողանում անել, ուսանողության՝ օրեցօր թափ հավաքող ալիքը կասեցնելու համար։ Դա է պատճառը, որ վերջին մեկ օրվա ընթացքում մի քանի բուհեր հայտարարեցին, թե ուսումնական գործընթացը բնականոն գնում է, իսկ ուսանողների մեծ մասը չի մասնակցում դասադուլներին, ինչն իհարկե, բացարձակապես չի համապատասխանում իրականությանը։

Ի դեպ Ժաննա Անդրեասյանը բավականին լուրջ հակառակորդներ ունի, ովքեր այս հանգամանքն օգտագործելով, փորձում են նրա ոտքերի տակից քաշել հողը։ Մասնավորապես՝ Նիկոլ Փաշինյանին հիշեցրել են, որ Ժաննա Անդրեասյանի հայրը ժամանակին եղել է Ռոբերտ Քոչարյանին պատկանող բանկի կառավարիչը և հիմա էլ «Արդշինբանկ»-ի խորհրդի անդամ է։ Անդրեասյանի դեմ այս ողջ արշավը համակարգում և իրականացնում է Արայիկ Հարությունյանը՝ վարչապետի աշխատակազմի ղեկավարը, որը նախկինում հենց ԿԳՄՍ նախարարն էր։ Հարությունյանը չի կարողանում մարսել այն հանգամանքը, որ իր նշանակյալ Դումանյանին հեռացրեցին նախարարի պաշտոնից՝ փոխարենը նշանակելով Ժաննա Անդրեասյանին, ով առանձնապես չի ցանկանում ենթարկվել Արայիկ Հարությունյանի քմահաճույքներին, ուստի և նախարարի դեմ լուրջ արշավ են սկսել՝ ընդհուպ վարչապետի մոտ նրան մեղադրելով սաբոտաժի մեջ։ Ինքը՝ Փաշինյանը, հրաշալի գիտակցում է, որ անվերահսկելի ուսանողությունը կարող է դառնալ շարժման լոկոմոտիվը և խարխլել իր՝ առանց այն էլ խարխուլ իշխանության հիմքերը, ուստի հենց սրանով էլ կարելի է բացատրել երիտասարդների նկատմամբ ոստիկանների առանձնակի դաժան վերաբերմունքը։

Նարինե Մելիքյան