Ադրբեջանի լկտիությունն անցնում է չափերը

44-օրյա պատերազմից հետո իր ռազմական ներուժը մի քանի անգամ մեծացրած Ադրբեջանն այնքան է լկտիացել, որ պաշտոնապես Երևանից պահանջում է չմեծացնել իր ռազմական ներուժը, լուծարել Արցախի պետական կառույցները և պաշտպանության բանակը։ Ադրբեջանի արտգործնախարարությունը հաղորդագրություն է տարածել, Հայաստանից պահանջել դադարեցնել մեծացնել ռազմական ծախսերը, ձեռնպահ մնալ ռևանշիստական ծրագրերից, չխախտել և կասկածի տակ չդնել Ադրբեջանի տարածքային ամբողջականությունը և իշխանությունը, դադարեցնել անջատողականության և ահաբեկչության հովանավորումն Ադրբեջանի, Ղարաբաղի տարածաշրջանում։

Պահանջել է նաև անհապաղ դուրս բերել հայ զինվորականներին, լուծարել Հայաստանին ենթակա ռեժիմի «ռազմական» և այսպես կոչված կառավարական կառույցները, զինաթափել հայկական բոլոր զինված ուժերը։ Միայն Փաշինյանի իշխանությունը կարող են հասցնել Հայաստանի ինքնիշխանությունն այնպիսի ստորին կետի, որ թշնամին այսքան լկստվեր և ընդհուպ Հայաստանի ներքին գործերին միջամտող հայտարարություններ աներ, իրեն թույլ տար պահանջել դադարեցնել ռազմական ծախսեր անելը։

Ի վերջո, Ադրբեջանն այնքան է կորցրել չափի զգացումը, որ այլևս չի էլ կարողանում կանգ առնել։ Այս հայտարարությունները, սակայն, որևէ կերպ չեն արժանանում Հայաստանի դավաճանական և թուրք-ադրբեջանական տանդեմի շահերը սպասարկող փաշինյանական վարչախմբի կոշտ գնահատականին, ընդհակառակը, լավագուն դեպքում միայն տարբեր բողոքներ և նվնվոցներ ենք լսում միջազգային տարբեր ասպարեզներում, թե՛ Փաշինյանի և թե՛ նրա արտգործնախարարի կողմից։ Մինչդեռ ավելի իրատեսական կլիներ, որ Փաշինյանն ու Միրզոյանը պարզ և հստակ և կոշտ պատասխանեին Ադրբեջանի ապօրինի պահանջներին, միջազգային հանրությանն էլ ցույց տային Ադրբեջանի պահանջների անթույլատրելիությունը։

Ի վերջո Հայաստանում ինքնիշխանությունը վերականգնելու մեկ ճանապարհ կա՝ ազատվել փաշինյանական իշխանությունների ներկայությունից, որից հետո դնել վերածննդի հիմքերը։

Գարիկ Գաբրիելյան